Sárt að fylgjast með úr fjarlægð og vill refsiaðgerðir gegn ólígörkum

„Ég held að allir séu mjög áhyggjufullir. Það eina sem ég get gert er að gefa pening til góðgerðafélaga, spítala eða hersins svo ég er að leita að leiðum til að hjálpa. Ég er líka að reyna sigta falsfréttir frá sannreyndum upplýsingum og deila þeim réttu á Twitter,” segir Naz í samtali við Vísi. Hann starfar hjá Háskóla Íslands og hefur búið hér á landi í um sex ár.

Hann bætir við að það hafi komið sér mjög á óvart að Rússar hafi gert svo umfangsmikla árás inn í Úkraínu og telur að margir íbúar landsins hafi ekki verið fyllega undir þetta búnir.

Hættu við að flýja borgina

Naz hefur meðal annars verið í samskiptum við ófríska frænku sína. Sú er nokkuð óttaslegin og vildi í morgun yfirgefa Kænugarð ásamt maka sínum og fara til ættingja sinna í Lutsk, sem situr nær landamærum Póllands.

Mikil fjöldi fólks hefur reynt að yfirgefa Kænugarð í dag og hafa helstu umferðaræðar stíflast. Hvarf hún því frá áformum sínum þar sem hún taldi umferðina úr borginni vera óbærilega, einkum fyrir konu í hennar stöðu.

Naz segir að úkraínsk stjórnvöld beini þeim skilaboðum til almennings að halda ró sinni þar sem ofsahræðsla muni eingöngu gera stöðuna verri. 

Hann kveðst jafnframt hafa rætt við Rússa í dag sem séu líkt og flestir aðrir ósáttir við aðgerðir rússneskra yfirvalda í Úkraínu. Mikið af íbúum Rússlands hafi fengið rangar og villandi upplýsingar í þarlendum fjölmiðlum og hafi því ekki raunsanna mynd af stöðunni.

Vill að vesturveldin beini sjónum sínum að rússneskum ólígörkum

Naz vonar að Evrópusambandið, Atlantshafsbandalagið og vesturveldin muni bregðast kröftuglega við innrás Rússa. Hann telur þá staðreynd að margar Evrópuþjóðir séu mjög háðar gasi frá Rússlandi muni sem fyrr hafa temprandi áhrif á viðbrögðin.

Hann bíður eftir því að gripið verði til harðari efnahagsþvingana og ekki síst að lokað verði á aðgang Rússa að alþjóðlega SWIFT-greiðslukerfinu svo þeir missi aðgang að innistæðum í erlendum bönkum.

„Það myndi hafa bein áhrif á ólígarka sem eru mjög áhrifamiklir í rússnesku efnahagskerfi. Þeir stýra orkufyrirtækjunum, fjármálakerfinu og fleiri geirum og ef þetta bitnar illa á þeim þá munu þeir þrýsta á Pútín að stöðva átökin.“

Einnig vonast Naz til að vesturveldin tryggi Úkraínumönnum herbúnað sem hjálpi þeim að verjast flugskeyta- og sprengjuárásum rússneska hersins.