City gerði fjórar tilraunir til að fá Kane

Guardiola viðurkennir einnig að hann hafi haft áhyggjur af því að tímabilið gæti verið í hættu þar sem liðinu vantar framherja. Þegar við skoðum stigatöfluna í ensku úrvalsdeildinni í dag sjáum við hins vegar að þær áhyggjur voru líklega óþarfar. City trónir á toppi deildarinnar með níu stiga forskot.

Manchester City tekur á móti Tottenham í ensku úrvalsdeildinni í dag, en þetta verður í fyrsta skipti sem Harry Kane mætir City eftir að liðið reyndi til hins ítrasta að kaupa hann í sumar. Kane var ekki í leikmannahóp Tottenham þegar liðið tók á móti City í upphafi tímabils.

Guardiola sagði frá því á dögunum að City hefði ítrekað reynt að fá Kane í sínar raðir, en forráðamenn Tottenham hafi staðið fastir á sínu.

„Ég hef aldrei, á mínum ellefu eða tólf ára þjálfaraferli, orðið vonsvikinn yfir því að félagið geti ekki gert eitthvað á leikmannamarkaðinumm,“ sagði Spánverjinn.

„Ég hef aldrei reynt að búa til eitthvað vandamál af því að ég stend fyrir félagið og félagið er alltaf hærra sett en ég sjálfur.“

„Við reyndum [að kaupa Kane] en þau kaup voru langt frá því að ganga í gegn af því að Tottenham stóð fast á sínu. Þegar það gerist, tvisvar, þrisvar og jafnvel fjórum sinnum, þá er þetta búið.“

Eins og áður segir hefur gengi City í ensku úrvalsdeildinni verið gott á tímabilinu, en Guardiola segir að hann hafi ekki getað vitað það fyrirfram.

„Við getum talað um það núna að allt gangi vel hjá okkur þrátt fyrir það að Kane hafi ekki komið. En á þeim tíma gátum við ekki vitað það. Við töpuðum á móti Leicester í Samfélagsskildinum og svo Tottenham í fyrstu umferð þannig að á þeim tímapunkti gat ég ekki vitað hvað myndi gerast á næstu vikum,“ sagði Guardiola að lokum.

Manchester City og Tottenham mætast í seinasta leik dagsins í ensku úrvalsdeildinni í dag. Leikurinn er mikilvægur fyrir bæði lið, en City er eins og áður segir í baráttu um Englandsmeistaratitilinn á meðan Tottenham þarf sárlega á stigum að halda í baráttunni um Meistaradeildarsæti.