Agla María: Einhverjar eru spenntar fyrir Barcelona

Breiðablik vann 3-0 sigur á Osijek frá Króatíu í dag og tryggði sér þar með sæti í riðlakeppni Meistaradeildarinnar. Agla María skoraði eitt mark í leiknum og lagði upp annað.

„Þetta er forréttindastaða, að spila svona lengi og mæta svona góðum liðum. Ég kvarta ekki,“ sagði Agla María við Helenu Ólafsdóttur á Stöð 2 Sport eftir leikinn.

Blikar voru mun sterkari aðilinn í leiknum og sigur þeirra var sanngjarn og öruggur.

„Það var gott að fá mark snemma. Það hjálpaði mikið til. Það var gott hversu agaðar og skipulagðar við vorum í vörninni. Það skilaði sér í dag. Þær þurftu að fara framar og þá opnaðist pláss fyrir okkur,“ sagði Agla María.

Dregið verður í riðla í Meistaradeildinni á mánudaginn og verða mörg stór lið í pottinum.

En á Agla María sér einhverja óskamótherja í riðlakeppninni?

„Ég veit ekki, einhverjar eru spenntar fyrir Barcelona en við tökum öllu,“ svaraði Agla María.

Hún segir að mikil eining og góður liðsandi sé í leikmannahópi Breiðabliks.

„Það er mjög góð stemmning í hópnum og það hefur sýnt sig. Við höfum spilað mjög þétt undanfarið og staðið vel saman og ætlum að klára þetta tímabil með stæl,“ sagði Agla María að endingu.