Stakk af úr leigubíl en skildi óvart símann eftir

Samkvæmt dagbók lögreglu fékk farþeginn símann sinn aftur og hét hann því að greiða skuld sína.

Skömmu fyrir miðnætti nótt barst tilkynning úr miðbænum um að ekið hefði verið á unga konu á rafmagnshlaupahjóli. Hún hafði þá ekið á eða í veg fyrir bíl á gatnamótum en samkvæmt lögreglu er ekki vitað hver staða umferðarljósa var þegar slysið varð.

Þá var konan ekki með hjálm eða annan öryggisbúnað og fann hún til eymsla í hendi. Sjúkraflutningamenn komu á vettvang en að endingu var það aðstandandi hennar sem var kominn á vettvang sem fór með hana á sjúkrahús.

Skömmu seinna barst tilkynning um að ölvaður maður á rafmagnshlaupahjóli hefði ekið á kantstein og fallið með höfuðið í götuna. Hann var með skurð á höfði og var fluttur á sjúkrahús með sjúkrabíl.

Lögreglunni barst einnig tilkynning um ungan mann sem brotið hafði rúðu í veitingastað í Kópavogi. Hann er sagður hafa verið í annarlegu ástandi og hafði verið að hóta fólki. Hann var vistaður í fangageymslu í nótt.