Björn Ingi hlýtur ekki náð fyrir augum Hæstaréttar

Landsréttur staðfesti dóm Héraðsdóms Vesturlands sem hafði fallist á kröfur Pressunnar ehf. um að veðsetningum á eignum félagsins, sem gerðar voru með lánasamningi milli Pressunnar ehf. og Björns Inga auk tryggingabréfs, yrði rift.

Um var að ræða allsherjarveð í Pressunni, auk vörumerkjanna og vefsíðanna Eyjan.is, Bleikt.is, 433.is, sem og útgáfurétt Pressunnar. Þá var þess krafist að yfirtöku Frjálsrar fjölmiðlunar ehf., sem tók yfir miðla Pressunnar skömmu áður en félagið fór í gjaldþrot árið 2017, á 80 milljóna skuld Björns Inga við Pressuna yrði rift. Héraðsdómur og Landsréttur féllust einnig á það.

Björn Ingi vildi skjóta málinu til Hæstaréttar sem tók fyrir málskotsbeiðnina í gær. Var henni hafnað en í ákvörðun Hæstaréttar segir að ekki sé hægt að líta svo á úrslit málsins hafi verulegt almennt gildi. Þá verði ekki séð að dómur Landsréttar sé bersýnilega rangur.