Airbnb greiddi konu sjö milljónir dala vegna nauðgunar

Bloomberg segir frá málinu, en þar segir að konan og vinir hennar hafi sótt lykla að íbúðinni í nálægri verslun sama kvöld. Árásarmaðurinn er sagður hafa látið gera afrit af lyklunum að íbúðinni og falið sig inni á baðherberginu þegar vinkonurnar voru úti að fagna árámótum.

Þegar konan sneri aftur í íbúðina, nokkru eftir miðnætti, hafi maðurinn, hinn 24 ára Junior Lee, ráðist á konuna. Hann hefur verið ákærður fyrir nauðgun og er í gæsluvarðhaldi, en hann neitar sök í málinu.

BBC segir frá því að í kjölfar árásarinnar hafi starfsmenn Airbnb leitað til lögreglunnar í New York og boðið fram aðstoð sína og útvegað fórnarlambinu hótelherbergi. Þá hafi fyrirtækið sömuleiðis staðið straum af sálfræðitímum fyrir konuna auk þess að greiða fyrir flug móður konunnar frá Ástralíu til Bandaríkjanna eftir árásina.

Sátt náðist svo milli Airbnb og konunnar tveimur árum eftir árásina þar sem konunni var boðið sjö milljóna dala sáttagreiðslu, um 850 milljónir króna, gegn því að hún myndi ekki lögsækja fyrirtækið eða þá eiganda íbúðarinnar þar sem árásin átti sér stað.