Barist um Arnarnesið í beinni úr Forsetahöllinni í kvöld

Leikur nágrannaliðanna Breiðabliks og Álftaness í 1. deild karla í körfubolta verður sýndur beint á Stöð 2 Sport í kvöld. Breiðablik er á toppi deildarinnar en Álftanesliðið er í fjórða sæti og aðeins tveimur stigum á eftir Blikum.

Leikurinn fer fram á heimavelli Álftanesliðsins, Forsetahöllinni sjálfri, og hefst hann klukkan 19.15. Útsendingin á Stöð 2 Sport hefst klukkan 19.05 en það er Tómas Steindórsson sem lýsir.

Breiðablik hefur spilað í Domino´s deildinni áður en Álftanes, sem kom upp úr 2. deildinni fyrir tveimur árum, er að reyna að komast þangað í fyrsta sinn í sögu félagsins.

Álftanes hefði verið með jafnmörg stig og Breiðablik hefði liðið snúið með bæði stigin heim frá Ísafirði en liðið tapaði þá með eins stigs mun á móti Vestra, 76-75. Álftanes var fimm stigum yfir þegar tvær mínútur voru eftir en Vestramenn skoruðu sex síðustu stig leiksins og tryggðu sér sigurinn.

Blikar hafa ekki spilað í ellefu daga eða síðan þeir töpuðu 100-88 á móti Skallagrími í Borgarnesi 15. febrúar síðastliðinn. Þeir höfðu þá unnið sex leiki í röð frá því að þeir töpuðu á móti Álftanesi 15. janúar síðastliðinn.

Þetta er nefnilega annar leikur liðanna í vetur en Álftanes vann 96-87 sigur á Blikum í Smáranum í fyrsta leik liðanna eftir að keppni hófst á nýjan leik eftir kórónuveiruhlé.

Cedrick Taylor Bowen skoraði þá 26 stig fyrir Álftanes og leikstjórnandinn Róbert Sigurðsson var með þrennu, skoraði 21 stig, tók 10 fráköst og gaf 10 stoðsendingar. Vilhjálmur Kári Jensson var síðan með 11 stig og 13 fráköst.

Árni Elmar Hrafnsson var stigahæstur hjá Blikum í þeim leik með 21 stig en Samuel Prescott Jr. skoraði 12 stig.

Þetta er annar leikurinn út 1. deild karla sem Stöð 2 Sport sýnir beint en það var boðið upp á mikla spennu fyrir viku síðan þegar Selfoss vann Hrunamenn 89-85 eftir æsispennu og framlengdan leik.