Flick nú með fleiri titla en töp og kom Bayern í hóp með 2009 liði Barca

Frakkinn Benjamin Pavard skoraði eina mark leiksins en þessi titill þýðir að Bayern er nú handhafi sex titla.

Liðið vann þrennuna á síðasta tímabili, varð þýskur meistari, þýskur bikarmeistari og vann Meistaradeildina. Liðið vann síðan bæði meistarakeppni UEFA og meistarakeppnina í Þýskalandi í haust.

Hansi Flick var ráðinn aðstoðarmaður Niko Kovac þegar Króatinn tók við í júlí 2019 en tók tímabundið við þegar Kovac hætti að þjálfa liðið 3. nóvember sama ár. Flick vann 2-0 sigur á Olympiacos í Meistaradeildinni í fyrsta leik og eftir frábæra byrjun fékk hann fastráðningu út tímabilið rétt fyrir jól.

Bayern hélt áfram að gera frábæra hluti undir stjórn Flick og í apríl gaf Bayern München honum síðan nýjan samning til ársins 2023. Bæjarar héldu upp á það með því að byrja að raða inn titlum.

Titlarnir eru núna orðið sex talsins frá því að sá fyrsti komi í hús 16. júní síðastliðinn. Aðeins eitt annað lið hefur náð því að verða sexfaldur meistari en Barcelona náði því undir stjórn Pep Guardiola árið 2009.

Það er líka magnað að skoða árangur Bayern liðsins undir stjórn Hansi Flick sem tók við liðinu í nóvember 2019. Síðan þá hefur liðið unnið 58 af 68 leikjum undir hans stjórn og lyft bikar á 11,3 leikja fresti.

Eftir sigurinn í gær en Bayern með fleiri titla (6) en tapleiki (5) undir stjórn Hansi Flick.

Robert Lewandowski náði í raun tvöfaldri sexu þegar hann var kosinn besti leikmaður heimsmeistarakeppni félagsliða. Hann hefur nefnilega náð í sex einstaklingsverðlaun á sama tíma og liðið hans hefur unnið þessa sex titla.

Lewandowski varð markakóngur í þýsku deildinni, í þýska bikarnum og í Meistaradeildinni. Hann var kosinn leikmaður ársins hjá bæði UEFA og FIFA og í gær svo bestur í HM félagsliða.