Aftur stórmót í golfi í Garðabæ

Í tilkynningu frá Golfsambandi Íslands kemur fram að undirbúningur fyrir mótið, sem er í höndum GSÍ, Odds og Golfsambands Evrópu, sé nú þegar hafinn.

Einu sinni áður hefur stórmót í golfi farið fram hér á landi en það var einnig á Urriðavelli, þegar EM kvenna var haldið þar sumarið 2016.

Búast má við því að vel á annað hundrað keppendur, þjálfarar og fylgdarlið mæti á mótið þarnæsta sumar, frá 20 löndum. Keppendur verða fremstu áhugakylfingar Evrópu, úr hópi 18 ára kvenna og yngri.

Evrópumót stúlknalandsliða fór fyrst fram árið 1991 og var haldið á tveggja ára fresti til ársins 1999 en hefur síðan verið haldið árlega. Mótið á Ísland verður númer 27 í röðinni. Síðast fór mótið fram í Slóvakíu og þar fögnuðu Þjóðverjar sigri.

„Hlakka til að veita stúlkunum færi á að heimsækja Ísland“

Haukur Örn Birgisson er forseti Golfsambands Íslands sem og Golfsambands Evrópu. Í tilkynningu frá GSÍ segist hann meðal annars hlakka til að geta gefið erlendum keppendum færi á að heimsækja Íslands:

„Við erum afar stolt af því að Ísland hafi verið valið sem áfangastaður fyrir Evrópumót í golfi. Evrópska golfsambandið var mjög ánægt með framkvæmdina árið 2016 og það sama má segja um keppendur í því móti. Evrópumót landsliða eru stærstu mót sem EGA stendur fyrir ár hvert og þessi mót eru ávallt haldin á bestu golfvöllum Evrópu. Í þessu vali felst því mikil viðurkenning fyrir Urriðavöll og félagsmenn í Golfklúbbnum Oddi. Með GSÍ-hattinn á mér hlakka ég mikið til áskorunarinnar sem felst í því að halda svona merkilegt golfmót og með EGA-hattinn á mér get ég ekki annað sagt en að ég hlakka til að veita stúlkunum færi á að heimsækja Ísland af þessu tilefni,“ segir Haukur Örn.