Gunnar tekur við Haukum: „Stelpurnar oft verið flagg­skipið“

Gunnar Gunnarsson hefur verið ráðinn þjálfari Hauka í Olís-deild kvenna en þetta var tilkynnt í dag. Gunnar segist spenntur fyrir verkefninu sem framundan er í Hafnarfirði.

Gunnar er afar reyndur þjálfari og fyrrum landsliðsmaður en hann lék yfir 70 landsleik fyrir Íslands hönd. Hann hefur bæði þjálfað hér heima og í Noregi en hann þjálfaði síðast lið Víkinga. Hann hætti þar í vor.

Gunnar tekur við Haukum af Árna Stefáni Guðjónssyni sem hætti með liðið eftir leiktíðina sem blásin var af vegna kórónuveirunnar en Hafnfirðingurinn hafði stýrt liðinu í eitt tímabil. Gunnar segir spenntur fyrir komandi leiktíð á Ásvöllum.

„Þetta leggst mjög vel í mig. Haukar eru eitt af flottari félögum landsins. Þar er flott umgjörð og allt til staðar. Þetta er skemmtilegt og spennandi lið,“ sagði Gunnar.

Guðrún Erla Bjarnadóttir, Saga Sif Gísladóttir og Alexandra Líf Arnarsdóttir hafa til að mynda yfirgefið Hauka eftir að tímabilinu lauk. Hann segir að Haukarnir hafi ekki verið að hugsa um það að leggja árar í bát.

„Það held ég að Haukar myndu seint gera. Stelpurnar hafa oft verið flaggskipið hjá þeim og mikil hefð fyrir kvennabolta. Það held ég að það hafi aldrei komið til greina.“

„Fyrst og fremst erum við að horfa á leikmannahópinn eins og hann er núna. Við höfum ekkert sest niður. Þetta bar skjótt af þar sem ég fékk hringingu á fimmtudag og gengið frá þessu í dag.“

Viðtalið við Gunnar í heild sinni má sjá hér að neðan.

Haukar voru í 5. sæti deildarinnar er hún var blásin af. Einnig fór liðið í undanúrslit Coca-Cola bikarsins.