Eins gott fyrir Söru að vera við öllu búin þegar Moli er á ferðinni í Simmagym

Íslenska CrossFit stjarnan Sara Sigmundsdóttir sýndi fylgjendum sínum frá einni af æfingum sínum eftir hátíðirnar en þar tók hún vel á því.

Sara sagði jafnframt frá því að nýtt æfingatímabil mun hefjast formlega hjá henni 5. janúar á nýju ári en þessa dagana sé hún mikið að prófa og mæla sig á æfingunum.

Æfingin sem Sara sagði frá bauð henni upp á míluhlaup á hlaupabretti og svo alls konar æfingar til að styrkja miðhluta líkamans.

Sara sýndi frá æfingu sinni og auðvitað var Moli ekki langt frá henni. Mola er nú orðinn stór og mikill og ekki alveg lengur sami litli hvolpurinn og hann var í sumar.

Moli reyndi að fá sína konu til að leika við sig á miðri æfingu og var auðvitað ekkert að pæla í því að sín kona væri á fullu að æfa.

Sara sýndi líka hvað gerðist einu sinni þegar Moli kom á fleygiferð og hoppaði á hana. Sara var þá nýbúin að gera kviðæfingar en fékk Mola beint ofan á sig. Það var auðvitað ekki þægilegt en sem betur fer er okkar kona með öfluga kviðvöðva.

„Flettið á næsta myndband ef þið viljið sjá hvernig Moli bregst við ef ég fer eitthvað að vorkenna sjálfri mér,“ skrifaði Sara í færslu sína sem má sjá hér fyrir neðan. Myndbandið af högginu frá Mola er á seinni myndinni.