Naomi Osaka og LeBron James valin í­­þrótta­­fólk ársins hjá AP

Hin 23 ára gamla Osaka og hinn 35 ára gamli LeBron hafa nýtt stöðu sína í samfélaginu til að láta í sér heyra er varðar málefni þeirra sem minna mega sín. Það ásamt því að vera með þeim bestu í sinni íþróttagrein gerir þau að íþróttafólki ársins hjá AP.

Er þetta í fyrsta sinn sem Osaka hlýtur þessa nafnbót en í fjórða skiptið sem LeBron verður þess heiðurs aðnjótandi.

Osaka er sem stendur á toppi heimslistans í tennis. Hún vann Opna bandaríska meistaramótið í einliðaleik á árinu, var það þriðja risamótið sem hún sigrar. Mætti hún í alla leiki mótsins með grímu sem prýddu mismunandi nöfn einstaklinga sem höfðu látið lífið vegna lögregluofbeldis. Þar má nefna George Floyd, Breonna Taylor, Trayvon Martin og fleiri.

„Í sannleika sagt hugsað ég ekki mikið hvað öðrum myndi finnast um gjörðir mínar. Skoðanir annarra voru ekki að fara stöðva mig í því sem ég vissi í hjarta mínu að væri rétt. Sterkar raddir þeirra Colin Kaepernick og LeBron James höfðu jákvæð áhrif á mig og styrktu mína eigin sannfæringu,“ sagði Osaka í viðtali.

Osaka varð einnig hæst launaða íþróttakona heims fyrr á árinu 2020, þá aðeins 22 ára að aldri. Hún hefur sett sér nokkur markmið fyrir komandi ár: „Vinna hörðum höndum, gera betur, nota rödd mína og vera góð manneskja:“

LeBron James fór fyrir sínum mönnum í Los Angeles Lakers er liðið varð meistari í fyrsta skipti frá árinu 2010. Var það hans fjórði NBA-meistaratitill ásamt því að hann var valinn MVP – mikilvægasti eða verðmætasti leikmaðurinn – í úrslitaeinvíginu gegn Miami Heat.

Lebron hélt áfram að stækka og styðja við „I PROMISE“ skólann sem hann stofnaði og aðstoðaði námsmenn eftir bestu getu er kórónufaraldurinn skall á. Hann hélt áfram að styðja við heimabæ sinn Akron með því að hjálpa til við að byggja húsnæði sem láglaunafólk hefur efni á að búa í.