Segir ríkisstjórnina keyra í gegn stefnu um málefni trans fólks án umræðu í samfélaginu

Þannig spyr Sigmundur Davíð Gunnlaugsson, formaður Miðflokksins, í pistli sem birtist á heimasíðu hans í dag. Þar fjallar hann meðal annars um stefnu ríkisstjórnarinnar í málefnum trans fólks.

Sigmundur segir stjórnvöld hafa innleitt lög um kynrænt sjálfræði án nokkurrar umræðu í samfélaginu og án þess að áhrif málsins lægju fyrir. Nú eigi að halda áfram og fyrir liggi ný frumvörp þar sem meðala annars eigi að „taka orðin „móðir“ og „kvenmaður“ úr lögum. Orð sem þóttu jákvæð og falleg.“

Ríkisstjórn Íslands vilji leggja bann við aðkomu foreldra og lækna

Upplagið að pistlinum er mál sem fór fyrir hæstarétt Bretlands, þar sem ung kona sagðist hafa verið látin fara í gegnum kynleiðréttingarferlið sem barn, sem hefði skaðað sig fyrir lífstíð.

„Dómstóllinn tók undir þá afstöðu [Keiru Bell] að börn hefðu ekki þroska til að taka slíkar ákvarðanir og að ekki ætti að setja þau í þá stöðu. Í tilviki 16 og 17 ára barna væri eðlilegt að fara fram á dómsúrskurð áður en ráðist yrði í lyfjagjöf og aðgerðir sem enn er óljóst hvaða áhrif muni hafa til langs tíma,“ segir Sigmundur.

Þá segir hann að ólíkt niðurstöðu dómstólsins um að börn skuli njóta leiðsagnar fullorðinna leggi „ríkisstjórn Íslands nú til að lagt verði bann við því að foreldrar eða læknar taki ákvörðun um aðstoð við börn sem fæðast með svokölluð ódæmigerð kyneinkenni.“

Umræddar aðgerðir hafi verið algengar og mörg hundruð börn fengið slíkar lækningar á undanförnum árum og áratugum.

Fá bágt fyrir að spyrja spurninga

„Ímyndarstjórnmál samtímans eru til þess fallin að fordæma og þagga niður alla umræðu um svona mál,“ segir Sigmundur og rekur það hvernig margir hafi fengið bágt fyrir að vekja upp spurningar um þróun mála, til dæmis femínistar sem séu uppnefndar „terfur“ en það stendur fyrir Trans Exclusionary Radical Feminist.

„Meðal frægustu fórnarlamba slíkra árása er breski rithöfundurinn J.K. Rowling sem leyfði sér að minna á að til væri orð yfir þann hóp fólks sem hefur tíðir og gaf til kynna að það orð gæti verið „kona“. Rowling er í aðstöðu til að standa af sér þá miklu herferð sem rekin hefur verið gegn henni en aðrar konur hafa misst vinnuna og mátt þola útskúfun fyrir að ræða þessi mál.“

Þá vísar hann einnig til afstöðu LGB Alliance, sem bendi á að sum þeirra barna sem fólk vill meina að séu trans gætu orðið samkynhneigð og hamingjusöm.

„Hví þá að setja þau í lyfjameðferð og aðgerð? Samtökin benda á að við séum aftur komin á þann stað að samkynhneigð krefjist leiðréttingar.“

Pistill Sigmundar í heild.