Kol­beinn skýtur föstum skotum á Brynjar: „Þetta er orðið ansi hreint þreytt hjá honum“

Kolbeinn Óttarsson Proppé, þingmaður Vinstri grænna, er afar gagnrýninn á starfsbróður sinn á þingi, Brynjar Níelsson, í Facebook-færslu sem hann birti í kvöld. Hann segist farinn að halda að Brynjar hafi ekki aðeins sleppt því að mæta á nefndarfundi, „heldur sleppt því að vera vakandi og fylgjast með nokkru síðustu mánuði.“

Eins og fjallað hefur verið um er Brynjar, sem situr á þingi fyrir Sjálfstæðisflokkinn, hættur að mæta á fundi stjórnskipunar- og eftirlitsnefndar Alþingis. Hann hefur óskað eftir því að fá að hætta í nefndinni og segir störf hennar „sjónarspil og pólitíska leiki.“ 

Brynjar hefur verið gagnrýninn á sóttvarnaaðgerðir stjórnvalda og hefur meðal annars sagst „hættur meðvirkni“ með þeim. Eins hefur hann sagt að engin rök hafi verið færð í því að samhengi sé á milli sóttvarnaaðgerða og fækkun þeirra sem daglega greinast með kórónuveiruna.

Kýs að nýta ekki réttinn til að haga sér eins og bjáni

Í færslu sinni segir Kolbeinn að Brynjar virðist telja það vera sitt hlutverk að „kasta bara einhverju fram án nokkurs rökstuðnings,“ undir þeim formerkjum að hlutverk hans felist í því að spyrja spurninga.

„Þetta er orðið ansi hreint þreytt hjá honum. Öllum hans spurningum hefur verið svarað í bak og fyrir, af sóttvarnaryfirvöldum og heilbrigðisráðherra. Spurningum um valdheimildir hefur verið svarað, t.d. á fundum stjórnskipunar- og eftirlitsnefndar, sem ég hef einmitt mætt á.“

Þá kveðst Kolbeinn líta á það sem hlutverk þingmanna, að sér meðtöldum, að taka ákvarðanir byggðar á vísindum og taka þátt í því að takast á við veiruna með þjóðinni. Hann segir þá rétt sinn til þess að haga sér „eins og bjáni“ ótvíræðan. Hann kjósi hins vegar að nýta sér hann ekki í miðjum heimsfaraldri.

„Steininn tekur þó úr þegar Brynjar er farinn að efast um sóttvarnaraðgerðir. Spurður í Kastljósi um þá staðreynd að aðgerðirnar hafa virkað, segir hann að allar aðgerðir hafi verið settar þegar bylgjan sé á niðurleið. Ég er farinn að halda að Brynjar hafi ekki bara sleppt því að mæta á nefndarfundi heldur sleppt því að vera vakandi og fylgjast með nokkru síðustu mánuði.“

Vísaði Kolbeinn þar til viðtals við Brynjar í Kastljósi í kvöld. Þar sagði hann meðal annars að stjórnskipunar- og eftirlitsnefnd hefði verið notuð í pólitískum upphlaupum, og vísaði þar sérstaklega til umfjöllunar nefndarinnar um vanhæfi sjávarútvegsráðherra.

„Ég er ekkert að eyða tíma mínum í svona leikþætti meira en ég þarf,“ sagði Brynjar meðal annars.

„Veit Brynjar þetta ekki?“

Kolbeinn segir þá að Brynjar geti einfaldlega flett upp í gögnum, séð hvenær aðgerðir voru settar á og skoðað þróun smita fyrir og eftir aðgerðir, auk þess hvernig stundum hafi þurft að herða aðgerðir þegar smittölur voru á uppleið.

„Veit Brynjar þetta ekki? Eða nennti hann ekki að fletta þessu upp og finnst ekki skipta máli að vera með staðreyndir á hreinu í umræðu um þetta mál, stærsta mál sem stjórnmál og samfélag hafa þurft að takast á við síðustu áratugi?“ spyr Kolbeinn, sem segir það heppni að í ráðherrastólum sitji fólk sem taki hlutina alvarlega.

„Að sóttvarnaryfirvöld hafa sýnt skynsemi og varfærni í tillögum sínum og að þjóðin hefur sýnt þá samstöðu sem komið hefur okkur í þá stöðu sem við erum í hvað faraldurinn varðar, þar sem samanburður við önnur lönd sýnir hve vel við stöndum,“ skrifar Kolbeinn að lokum.