Meistararæða Þor­steins á Zoom hitti beint í mark

Berglind Björg Þorvaldsdóttir var stödd á hótelherbergi með liði sínu Le Havre í Frakklandi er hún fékk skilaboðin um að hún væri Íslandsmeistari í knattspyrnu eftir að Íslandsmótin voru blásin af fyrir helgi.

Berglind Björg lék með Breiðablik stærsta hluta sumarsins en í síðasta mánuði gekk hún í raðir Le Havre sem er nýliði í frönsku úrvalsdeildinni. Þar hefur hún raðað inn mörkum en hún sagði að þetta hafi verið skondin upplifun fyrir helgi.

„Ég var á hóteli með liðinu mínu og við vorum að fara spila útileik,“ sagði Berglind og hélt áfram: „Ég fékk send skilaboðin „Til hamingju“ og ég fór strax á netið og sá að það væri búið að slaufa mótinu,“ sagði Berglind við Vísi í dag.

„Ég sagði svo við Önnu Björk (Kristjánsdóttur) liðsfélaga minn að ég væri orðinn Íslandsmeistari. Þetta var virkilega góð tilfinning að verða Íslandsmeistari en á sama tíma smá skrýtið þar sem við fengum ekki að lyfta dollunni. Vonandi fáum við þó að fagna þessu öll saman í desember,“ sagði Berglind.

En hvað fannst henni um ákvörðun KSÍ?

„Persónulega hef ég ekki mikla skoðun á þessu þar sem ég er ekki að spila heima lengur en ég sá niðurstöðurnar úr könnun Leikmannasamtakanna. Þar kom í ljós að meirihlutinn af leikmönnum úr Pepsi Max deildunum vildu að mótið myndi enda en það er margt sem KSÍ þurfti að skoða enda mikið í húfi. Eins og staðan er núna í samfélaginu þá er fótboltinn ekki í fyrsta sæti þannig ég held að það hafi verið rétt ákvörðun að enda mótið.“

Breiðablik fagnaði Íslandsmeistaratitlinum á Zoom, annað en einhver önnur lið, og fengu Blikarnir mikil hrós fyrir það.

„Zoom fundurinn var frábær. Við vorum öll saman í hátt í þrjá tíma að rifja upp árið og tímabilið. Þetta er búið að vera ótrúlega sérstakt ár hjá okkur og uppskera svo titilinn í lokinn er virkilega góð tilfinning. Steini var með meistararæðu í beinni og einnig Aron styrktarþjálfari. Báðar ræðurnar hittu beint í hjartað. Vonandi getum við svo opnað kampavínsflöskuna öll saman þegar ástandið er orðið betra.“

Eins og áður segir leikur Berglind nú í Frakklandi þar sem hún hefur veriðað gera það ansi gott. Hún segir að mikil meiðsli hafi herjað á Le Havre en franski boltinn hentar henni vel.

„Lífið í Frakklandi er bara nokkuð gott. Reyndar er útgöngubann núna sem gildir út nóvember en við megum æfa og spila leikina þannig maður kvartar ekki. Tímabilið hjá okkur hefur verið pínu strembið þar sem margir leikmenn eru búnir að meiðast hjá okkur en við höldum áfram að berjast og ég hef fulla trú á því að þetta fer að detta inn hjá okkur.“

„Franski boltinn hentar mér vel myndi ég segja. Þetta er mjög skemmtileg deild og allir leikir gríðarlega erfiðir. Allir geta unnið alla, nema kannski Lyon og PSG sem eru í sérflokki en frá þriðja sætinu og niður getur allt gerst. Svo er þessi deild ein sú sterkasta í Evrópu þannig það er gaman að máta sig í þessari deild.“

Berglind kom inn á sem varamaður í landsleik Íslands gegn Svíþjóð á dögunum og hún segir að stefnan sé að sjálfsögðu að koma sér í byrjunarliðið.

„Að sjálfsögðu er markmiðið að komast í byrjunarliðið og auðvitað vill maður fá sem flestar mínútur. Minn fókus er hins vegar að standa mig vel með félagsliðinu og vonandi skilar það sér inn í landsliðið. Við erum með sterkan hóp og það er samkeppni í öllum stöðum. Ég virði ákvörðun þjálfarans og ég er bara tilbúin þegar kallið kemur.“