Magnamenn vilja klára mótið og ætla ekki að senda útlendingana heim

Talsverð umræða hefur skapast á samfélagsmiðlum um hvort blása eigi Íslandsmótið í fótbolta af vegna kórónuveirufaraldursins. Ef mótið verður flautað af verður litið til meðal stigafjölda liða í leik til að ákvarða lokaniðurstöðu deildanna.

Tveimur umferðum er ólokið í Lengjudeild karla og mikil spenna er bæði á toppi og botni hennar. Í þremur neðstu sætunum eru Þróttur, Magni og Leiknir F. en þau eru öll með tólf stig. Ef mótið yrði flautað af myndu Þróttarar halda sér uppi á hagstæðari markatölu en Magnamenn og Leiknismenn. Þróttur er með 24 mörk í mínus, Magni 25 og Leiknir 30.

Magni er því eitt þeirra liða sem hefur hag að því að mótið verði klárað og vonast þjálfari liðsins, Sveinn Þór Steingrímsson, til að það verði gert. KSÍ hefur gefið sér frest til 1. desember til að klára Íslandsmótið.

„Að sjálfsögðu höfum við pælt í þessu en það hefði ekki breytt neinu hvort þú hefðir hringt í mig núna eða áður en öll þessi neikvæða umræða kom, að allir væru að senda útlendingana sína heim. Það er alltaf sama svar hjá okkur. Við viljum auðvitað klára mótið. Það eru allir á þeirri línu,“ sagði Sveinn í samtali við Vísi.

En myndu Magnamenn skilja það ef Íslandsmótið yrði blásið af?

„Eflaust myndum við skilja það þótt við yrðum eflaust skúffaðir með það. En KSÍ er búið að gefa sér frest til 1. desember og það er langt þangað til,“ svaraði Sveinn.

„Lið hafa oft lent í vandræðum en klórað sig út úr þeim. Keppni hefur ekki verið hætt. Auðvitað eru þetta leiðinlegar aðstæður en eru þær ekki leiðinlegar fyrir öll lið?“

Undanfarna daga hafa borist fréttir af því að lið íhugi eða séu hreinlega búin að senda erlenda leikmenn sína heim. Magnamenn ætla ekki að fara þá leið.

„Við ætlum að halda útlendingunum og viljum klára þetta mót,“ sagði Sveinn en Magni er með fjóra erlenda leikmenn í sínum röðum.

Annað sem rætt hefur verið um í tengslum við möguleg lok Íslandsmótsins er aðstaða liða, sérstaklega á landsbyggðinni. Sveinn segir að síðasta æfingin á Grenivík verði í dag og eftir það færi Magnamenn sig til Akureyrar.

„Við erum eiginlega dottnir inn í vetrartímabilið okkar þar sem við æfum á Akureyri á KA-svæðinu eða í Boganum,“ sagði Sveinn. Magni á einn heimaleik eftir, gegn Vestra, en Sveinn segir óvíst hvar hann fer fram.

„Við erum með KA-svæðið, Bogann eða Dalvíkurvöll sem við gætum spilað á. Það er eitthvað sem við munum ákveða þegar við vitum meira,“ sagði Sveinn.

Magni og önnur lið á landsbyggðinni hafa það þó fram yfir liðin á höfuðborgarsvæðinu að þau mega æfa um þessar mundir.

„Við erum með tvo leikmenn á höfuðborgarsvæðinu sem æfa einir. En aðrir eru hér og við höldum æfingar,“ sagði Sveinn.

Magni bjargaði sér á ótrúlegan hátt frá falli í 2. deild 2018 og 2019 og Grenvíkingar vilja fá tækifæri til að endurtaka leikinn í ár.

„Það er allt jákvætt hjá okkur og við getum ekki beðið eftir því að þetta byrji aftur. Við viljum alltaf klára þetta mót,“ sagði Sveinn að lokum.