Þrír hundar mannsins brunnu inni í húsbílnum

Karlmaðurinn sem lést í eldsvoða í húsbíl við Torfastaði í Grafningi í Árnessýslu á föstudagskvöld átti þrjá hunda. Hundarnir þrír brunnu allir inni með eiganda sínum.

Enginn hjá fjarskiptamiðstöð ríkislögreglustjóra svaraði áframsendu símtali frá Neyðarlínunni á föstudagskvöld. Innhringjandi gafst upp eftir 57 sekúndur. 

Aðstoðarframkvæmdastjóri Neyðarlínunnar segir galla á kerfi hennar að símtalið rataði ekki á málalista. Ekki liggur fyrir hvers vegna enginn svaraði í símann hjá fjarskiptamiðstöð.

Maðurinn og hundarnir fundust ekki fyrr en eftir aðra ábendingu, klukkan hálftvö á laugardag, rúmum hálfum sólarhring síðar. Hundarnir voru blendingar, að mestu Border Collie.

Hönnunargalli á tölvukerfi 112

Fréttastofa hefur reynt að fá skýringar á málinu bæði frá lögreglunni á Suðurlandi í dag og Neyðarlínunni en án mikils árangurs.

„Neyðarlínan svaraði símtalinu og gaf á fjarskiptamiðstöð lögreglunnar. Símtalinu var ekki svarað af fjarskiptamiðstöðinni og slitið eftir 57 sekúndur af innhringjanda. Síðan er óljóst hvað gerðist eftir það og verið er að skoða það,“ segir Þórhallur Ólafsson, framkvæmdastjóri Neyðarlínunnar, á fimmta tímanum.

Tómas Gíslason, aðstoðarforstjóri Neyðarlínunnar, hafði áður tjáði Ríkisútvarpinu síðdegis að hönnunargalli væri á tölvukerfi Neyðarlínunnar.

Símtalinu hafi verið beint til fjarskiptamiðstöðvar Ríkislögreglustjóra en enginn svarað. Eftir tæpa mínútu hafi innhringjandinn gefist upp. Venjulega séu slík símtöl þó skráð á verkefnalista og hringt til baka.

Haft er eftir Tómasi að álagið á símkerfið hafi verið mjög mikið á föstudagskvöldinu. Þá fari þau símtöl ekki á skrá sem voru í biðröð í kerfinu en aldrei ratað beint á tiltekið símtæki. Þessi galli verði lagaður í dag eða á morgun að sögn Tómasar.

Oddur Árnason yfirlögregluþjónn tjáði Ríkisútvarpinu fyrr í dag að talið væri að maðurinn hefði þegar verið látinn þegar ábendingin barst Neyðarlínunni á föstudagskvöld.

Harma mjög að símtalið skilaði sér ekki

Í tilkynningu frá Ríkislögreglustjóra og Neyðarlínunni 112 nú á fimmta tímanum segir að aðilarnir „harmi mjög að símtal þar sem tilkynnt um eld við Torfastaði í Grímsnesi hafi ekki skilaði sér í útkalli slökkviliðs og lögreglu á svæðinu.“

Markmið lögreglu og 112 sé fyrst og fremst þjónustuhlutverk við almenning í landinu þegar neyð steðjar að. Ekki er útskýrt hvers vegna ekki var svarað í símann hjá fjarskiptamiðstöð lögreglu.

„Tæknilegir annmarkar urðu til þess að lögregla fékk ekki tilkynningu um atburðinn áður en innhringjandi sleit símtali. Það skýrist af því að mál stofnaðist ekki í kerfum sem fjarskiptamiðstöð og 112 vinna með þegar símtalið var flutt á milli. Þegar hefur verið sett af stað vinna til þess að bæta hugbúnað svo slíkt geti ekki endurtekið sig.“

Fréttin var uppfærð klukkkan 17:34 og upplýsingar fjarlægðar sem áttu ekki erindi í frétt á þessu stigi málsins.