Lífið hjá móður smábarns þegar hún undirbýr sig fyrir heimsleika í CrossFit

Líf Köru Saunders í dag verður kannski mjög líkt lífi Anníe Mist Þórisdóttur á heimsleikunum á næsta ári. Sú ástralska leyfði okkur að fylgjast með einum degi hjá sér í lokaundirbúningi sínum fyrir heimsleikana.

Ástralska CrossFit stjarnan Kara Saunders hefur sýnt CrossFit konum heims hvernig þú getur komið þér aftur í heimsklassa stuttu eftir barnsburð. Hún tryggði sér sæti á heimsleikunum aðeins fimm mánuðum eftir að hún átti dóttur sína.

Kara Saunders verður því í sviðsljósinu á föstudaginn þegar keppni hefst á heimsleikunum. Hún hefur verið öllum íþróttamömmum mikil fyrirmynd í endurkomu sinni eftir barnsburð.

Kara ákvað að leyfa aðdáendum sínum að sjá hvernig dagurinn væri hjá henni sextán dögum fyrir heimsleikana en hún var þá ein með dóttur sína en þurfti líka að halda áfram að undirbúa sig fyrir heimsleikana.

Kara Saunders er á leið á sín áttundu heimsleika en bestum árangri náði hún árið 2017 þegar hún krækti í silfurverðlaunin. Hún hefur þrisvar verið meðal þeirra fimm hæstu á heimsleikunum.

Scotti, dóttir Köru Saunders, fæddist í maí 2019, og er því orðin eins og hálfs árs gömul.

Kara Saunders fór yfir daginn sinn og viðurkenndi að hún væri ekki viss um það hvort hún ætti að sýna heiminum þetta myndband. Það gerði hún engu að síður.

Kara Saunders fór yfir það hvernig hún reynir að koma þremur æfingum fyrir á deginum í bland við það að hugsa um dóttur sína.

Hún byrjaði á endurheimt og dóttir hennar fékk þá að vera í kringum hana. Það gekk ágætlega enda Scotti líklega löngu orðin vön því að sjá mömmu sína að lyfta lóðum eða gera æfingar.

Aðra æfinguna gerði Kara Saunders síðan á meðan Scotti lagði sig um hádegið og þriðji æfinguna gerði hún síðan um kvöld eftir eða Scotti var farin að sofa.

Það má sjá aðeins inn í heim Köru Saunders með því að horfa á myndbandið hér fyrir neðan.