Annað kórónu­veiru­smit hefur greinst á Ís­landi

Annað kórónuveirusmit hefur verið staðfest hér á landi. Þetta staðfesti Víðir Reynisson, yfirlögregluþjónn hjá  Ríkislögreglustjóra, í samtali við fréttastofu Vísis. Áður hafði íslenskur karlmaður á fimmtugsaldri greinst með veiruna sem veldur sjúkdómnum COVID-19 og eru nú 85 manns í sóttkví hér á landi vegna veirunnar. 

Einstaklingurinn sem um ræðir er karlmaður á sextugsaldri og hafði verið á ferðalagi á Ítalíu en var utan skilgreinds hættusvæðis. Maðurinn er í heimasóttkví og er ekki mikið veikur. Hann kom heim til Íslands með vél Icelandair frá Verona í gær. Mennirnir tveir sem hafa greinst með veiruna tengjast ekki. 

Búið er að virkja fullmannaða samhæfingarmiðstöð almannavarna. Almannavarnir og starfsfólk sóttvarnalæknis mun í kvöld hefjast handa við að rekja allar mögulegar smitleiðir og munu þeir einstaklingar sem taldir eru í hættuhópi fá upplýsingar um stöðu mála og leiðbeiningar um sóttkví.

„Þetta er bara hluti af því sem við áttum von á, þetta er bara samkvæmt okkar viðbragðsáætlun,“ segir Víðir. 

Að hans sögn hefur einstaklingurinn fylgt ráðstöfunum sóttvarnarlæknis.

„Hann fylgdi þeim alveg frá því í gær þegar sýnið var tekið úr honum og hann fékk leiðbeiningar.“

Verður hann áfram í heimasóttkví að öllu óbreyttu nema hann veikist frekar en ólíklegt er talið að svo verði.

Maðurinn sem greindist fyrstur með kórónuveiruna hér á landi hafði einnig verið á ferðalagi á Ítalíu, ásamt eiginkonu sinni og dóttur, í liðinni viku og veiktist hann við heimkomu þann 22. febrúar síðastliðinn. Þau höfðu verið á svæði á Norður-Ítalíu sem var skilgreint utan hættusvæðis. Viðbúnaðarstig almannavarna hefur verið hækkað úr óvissustigi í hættustig.

Í kjölfar þess að maðurinn var greindur með veiruna voru ferðir hans raktar og eftir þá vinnu var óskað eftir því að 49 einstaklingar, sem bæði eru staddir erlendis og hér á Íslandi, væru í sóttkví næstu fjórtán dagana.

Þá var sýni úr eiginkonu mannsins neikvætt og ferðir hennar því ekki raktar en hún er stjórnandi innan Háskólans í Reykjavík og var nemendum skólans tilkynnt þetta í tölvupósti í gær. Maðurinn vinnur á um tuttugu manna vinnustað og hafði mætt til vinnu eftir heimkomu frá Ítalíu. Hann hafði unnið mánudag og þriðjudag og fór slappur heim úr vinnu á miðvikudag. Átján samstarfsmenn hans eru nú í sóttkví.

Í gær, 29. febrúar, var ákveðið að nýta Fosshótel á Rauðarárstíg sem sóttkví fyrir þá sem væru mögulega smitaðir af kórónuveirunni. Þá voru 85 í sóttkví hér á landi frá og með gærkvöldinu. Öll sýni sem voru tekin úr fólki sem tengdust fyrsta greinda tilfellinu hérlendis hafa reynst neikvæðar.

Tíu sýni sem hafa verið tekin og prófuð fyrir kórónuveirusmiti í dag reyndust neikvæð. Unnið var að greiningu tveggja til viðbótar í dag og reyndist annað sýnið af þeim tveimur jákvætt.

Fréttin hefur verið uppfærð.