Strákurinn á kústinum í stór­hættu | Mynd­band

Ungur drengur sem var á kústinum í leik KR og Keflavíkur í Dominos-deild karla á föstudagskvöldið komst í hann krappann undir lok fyrri hálfleiks er hann sinnti sínum störfum.

KR komst aftur á sigurbraut er liðið vann stórleik umferðarinnar gegn Keflavík í hörkuleik. Lokatölur 88-82 sigur Íslandsmeistarana sem spiluðu vel í leiknum.

Undir lok fyrri hálfleiks var Keflavík í sókn en kastaði frá sér boltanum. KR fór í hratt upphlaup en á vallarhelmingi Keflvíkinga var ungi drengurinn að þrífa upp svitablett á gólfinu.

Hann var þó fljótur að sjá í hvað stefndi og kom sér með hraði út af gólfinu svo allir sluppu með skrekkinn.

Þetta stórskemmtilega atvik má sjá hér að ofan.