Hallur og Jón Kristinn leiða káta íslenska Brexit-menn um London

Heldur minni hópur Íslendinga en að var stefnt er farinn utan til Englands til að fagna með Bretum þegar þeir ganga með formlegum hætti úr Evrópusambandinu í kvöld klukkan 23. Boðað var til ferðarinnar fyrir nokkru, skipulögð af Heimsýn – Hreyfing sjálfstæðissinna í Evrópumálum, en þegar upp var staðið stendur hópurinn ekki saman af nema 12 til 15 mönnum.

Fámennt, en góðmennt eins og sagt er því þarna mun gleðin verða við völd. Heldur betur. Enda um heimssögulegan viðburð að ræða.

Komast í innsta hring vegna sambanda Halls

Vísir ræddi við einn foringja hópsins, Gunnlaug Ingvarsson stjórnarmann í Heimssýn og formann Frelsisflokksins, fyrir nokkru í tilefni ferðarinnar og var mikill hugur í honum.

Fararstjóri er Hallur Hallsson fréttamaður sem að sögn Gunnlaugs er mikill sérfræðingur í Evrópusambandinu sem og breskum stjórnmálum. Honum verður svo innan handar Jón Kristinn Snæhólm stjórmálafræðingur en hann er einnig sérfróður um bresk stjórnmál.

Telja verður það vel til fundið að fá þá Hall og Jón Kristinn til að leiða hópinn en Hallur skrifaði einmitt bók um Evrópusambandið, Vulture´s Lair, og var útkomu bókarinnar fagnað sérstaklega einmitt í London.

„Já, í Westminster,“ segir Gunnlaugur sem sér fyrir sér að sambönd þeirra Halls og Jóns Kristins muni verða til þess að hópurinn komist jafnvel í innsta hring Brexitsinna og í gleðskap í þeim ranni sem væntanlega hömlulaus.

Hér neðar má sjá frá útgáfuveislu þegar bók Halls var fagnað í London með mikilli viðhöfn. Sjónarmið Halls hafa orðið ofan á í Bretlandi.

Munu lyfta einni bjórkönnu eða tveimur

Auk þeirra tveggja og Gunnlaugs verður svo formaður Heimssýnar, Haraldur Ólafsson veðurfræðingur, í hópnum. Hópurinn fór utan í gær og snýr aftur 2. febrúar. Gist er á Grand Hotel við Hyde Park.

Dagskrá ferðarinnar er svo tíunduð á heimasíðu Heimssýnar.

„Gunnlaugur segir að Váfugli, bók Halls sem einnig var gefin út á ensku, hafi verið sérlega vel tekið á Bretlandi. „Sérstakalega af þeim sem voru skeptískir. Hún vakti mikla athygli í pólitíkinni þegar hún var gefin út og hann hefur mikil sambönd. Við fáum að komast inn í allskonar partí sem þeir halda. Við komum til með að skoða þinghúsið og förum að stalli W. Churchills. Þetta verður mikil menningareisa,“ segir Gunnlaugur.

Og hann segir að áreiðanlega verð stungið úr einni bjórkönnu eða svo við þetta tækifæri. Þetta er partí. Þá segir Gunnlaugur að nokkur spenna ríki um hvort klukkum Big Ben verði hringt þegar útgangan verður formleg, líkt og var gert í lok seinni heimstyrjaldar. En einhverjar viðgerðir hafa staðið yfir á Big Ben.

Hér neðar má svo sjá viðtal Jóns Kristins við Hall Hallsson um bók hans Vulture´s Lair.