Svona komast íslensku strákarnir í undanúrslitin á EM

Strákarnir okkar í íslenska karlalandsliðinu í handbolta héldu ekki aðeins von um sæti í umspili Ólympíuleikanna á lífi með sigrinum á Portúgal.  

Eftir tapleikina á móti Ungverjalandi og Slóveníu voru margir farnir að afskrifa sæti í umspili um laus sæti á ÓL í Tókýó hvað þá að fá tækifæri að spila um verðlaun.

Íslenska þjóðin fór hátt upp eftir sigrana á Dönum og Rússum í fyrstu tveimur leikjunum en fór jafnframt lang niður eftir vonbrigðin gegn Ungverjum og Slóvenum.

Nú er ástæða til að trúa á ný og vonir íslenska liðsins fá byr undir báða vængi á samfélagsmiðlum.

Gróttumaðurinn Jökull Finnbogason á Twitter er nefnilega búinn að finna út leið íslenska landsliðsins í undanúrslit á EM 2020.

Þetta þarf að gerast til að Ísland komist í undanúrslit samkvæmt útreikningum Jökuls:

Portúgal vinnur Sloveníu

Ísland vinnur Noreg

Svíþjóð vinnur Ungverja

Portúgal vinnur Ungverja

Noregur vinnur Slóveníu

Ísland vinnur Svíþjóð

Semi Finals!#handbolti#emruv

— Jökull Finnbogason (@Jokullf) January 19, 2020

Fari leikirnir eins og hér fyrir ofan þá verður lokastaðan svona í milliriðli Íslands:

1. Noregur 8 stig

2. Ísland 6 stig

3. Portúgal 6 stig

4. Ungverjaland 4 stig

5. Slóvenía 4 stig

6. Svíþjóð 2 stig

Íslenska landsliðið kæmist þá áfram í undanúrslitin á kostnað Portúgala vegna betri árangurs í innbyrðisleikjum. Sigurinn í gær myndi þá skila íslenska liðinu í leiki um verðlaun.

Það er samt eitt að ná því að vinna bæði Noreg og Svíþjóð, tvo daga í röð, en síðan annað að öll úrslit í hinum leikjunum verði okkur í hag.

Það sem er aftur á móti ljóst er að Ísland á enn möguleika á komast alla leið í leiki um verðlaun á þessu Evrópumóti og sigurinn í gær gefur öllum nýjan kraft, ekki bara leikmönnunum sjálfum heldur handboltaáhuga allrar þjóðarinnar.