Danir þeir einu sem hafa unnið Norðmenn á síðustu tveimur stórmótum

Norska karlalandsliðið í handbolta hefur unnið alla fimm leiki sína á þessu Evrópumóti og í dag er komið að íslensku strákunum að reyna að enda þessa sigurgöngu norska liðsins.

Íslenska landsliðið mun reyna að leika það eftir sem aðeins einu landsliði hefur tekist á stórmótum síðustu tveggja ára.

Norðmenn eru á góðri leið inn í undanúrslitin á öðru stórmótinu í röð en þeir urðu í öðru sæti á heimsmeistaramótinu í fyrra. Þar með er ekki öll afrekaskrá liðsins upptalinn því norska liðið hefur verið áberandi á stórmótum allt frá árinu 2016.

Norska liðið vann 2 af 3 leikjum sínum í milliriðli á EM fyrir tveimur árum en það skilaði þó liðinu ekki meiru en sjöunda sæti.  Tapleikir liðsins í mótinu komu á móti Frökkum (riðlakeppni) og Króötum (milliriðill) og norska liðið fékk jafnmörg stig í milliriðli og Svíar sem fóru í undanúrslitin.

Norðmenn stóðu hins vegar verst af þremur liðum með sex stig og urðu í fjórða sæti í sínum milliriðil. Norska liðið var því ótrúlega nálægt leikjum um verðlaun á því móti líka. Þeir voru síðan í úrslitaleik HM árið 2017 og töpuðu leiknum um þriðja sætið á EM 2016. Við erum því að tala um á fjórum síðustu stórmótum hefur norska karlalandsliðið í handbolta verið meðal bestu liða.

Á síðustu tveimur stórmótum, HM 2019 og EM 2020, hefur norska liðið aðeins tapað tveimur leikjum og komu bæði þessi töp á móti verðandi heimsmeisturum Dana. Danir unnu Norðmenn bæði í riðlinum og síðan í sjálfum úrslitaleiknum um heimsmeistaratitilinn.

Hér fyrir neðan má sjá úrslitin úr leikjum Noregs á síðustu tveimur stórmótum og þar má sjá marga sannfærandi sigra liðsins.



Leikir Norðmanna á síðustu tveimur stórmótum

HM í Þýskalandi og Danmörku 2019:

10 marka sigur á Túnis (34-24)

19 marka sigur á Sádí Arabíu (40-21)

10 marka sigur á Austurríki (34-24)

21 marks sigur á Síle (41-20)

4 marka tap fyrir Danmörku (26-30)

4 marka sigur á Egyptalandi (32-28)

3 marka sigur á Svíþjóð (30-27)

9 marka sigur á Ungverjalandi (35-26)

6 marka sigur á Þýskalandi (31-25) - undanúrslit

9 marka tap fyrir Dönum (22-31) - úrslitaleikur

EM í Svíþjóð, Noregi og Austurríki 2020:

6 marka sigur á Bosníu (32-26)

2 marka sigur á Frakklandi (28-26)

6 marka sigur á Portúgal (34-28)

7 marka sigur á Ungverjalandi (36-29)

3 marka sigur á Svíþjóð (23-20)

Samtals:

13 sigrar í 15 leikjum

Norðmenn á síðustu fjórum stórmótum:

HM 2019 - 2. sæti

EM 2018 - 7. sæti

HM 2017 - 2. sæti

EM 2016 - 4. sæti