Ósáttur með að leikmaðurinn væri nafngreindur | Gerði allt rétt

Í gærkvöld greindi Fótbolti.net frá því að leikmaður kvennaliðs Breiðabliks hefði greinst með kórónuvírusinn. Í kjölfarið greindi Almannavernd ríkislögreglustjóra frá smitinu á Facebook-síðu sinni. Allt lið Blika er því farið í sóttkví og leikmaðurinn sem um er ræðir í einangrun.

Þorsteinn Halldórsson, þjálfari Blika, furðar sig á því að fjölmiðlar hafi vitað um málið svo snemma en aðeins fimm mínútum eftir að Þorsteinn frétti af smitinu var það komið í fjölmiðla. Hann hefur þó litlar áhyggjur af því að lið hans þurfi að fara í 14 daga sóttkví og vonast að enginn annar hafi smitast.

Sjá einnig: Leikmaður Breiðabliks smitaður

„Það veit enginn af þessu hjá Breiðabliki fyrr en fréttamaður hringir og spyr að þessu. Þessu var bara skellt fram án vitneskju leikmanna. Við settum inn tilkynningu á síðu leikmanna og hringdum í foreldra yngstu leikmanna liðsins. Við ætluðum svo að ræða við leikmenn í dag. Þetta var tilkynnt í fjölmiðlum áður en við náðum að tilkynna leikmanninum frá þessu. Ég fékk bara að vita þetta fimm mínútum áður en þetta fer í fjölmiðla,“ sagði Þorsteinn ósáttur með hvernig fjölmiðlar tóku á málinu.

„Hvaða máli skiptir hver þetta er, ég sé ekki tilganginn með því að nafngreina hana. Fólk getur alveg lagt tvo plús tvo saman og komist að því hver þetta er en það er skandall að nafngreina hana fyrir alþjóð.“

Hann sagðist hafa heyrt í leikmanninum og talað við hana. Hún hafi verið einkennalaus við komuna til landsins, hafi farið í skimun í Leifsstöð og ekkert hafi greinst. Þá hafi leikmaðurinn verið – og er enn – einkennalaus. Því sé ómögulegt að reyna kenna henni um enda hafi hún – og Breiðablik – farið eftir öllum þeim verkferlum sem eru til staðar.

„Það getur enginn kennt sér um að smitast af þessari veiru, það veit enginn hver er sýktur fyrr en að viðkomandi hefur greinst með veiruna. Það hefur fullt af fólki fengið veiruna en ekki sýnt nein einkenni. Hún hefur ekki fengið nein af þeim einkennum sem lýsa sér sem viðbrögð við því að vera með veiruna.“

Málið var rædd í Pepsi Max Mörkunum í gær skömmu eftir að það kom upp. Margrét Lára Viðarsdóttir, annar af sérfræðingum þáttarins, tók skýrt fram að ekki væri neinum að kenna

Hvða varðar næstu daga er ljóst að leikmenn Breiðabliks fari í 14 daga sóttkví en annars bíður liðið eftir frekari upplýsingum frá KSÍ. Sem stendur þarf allavega að fresta tveimur leikjum hjá Breiðabliki.

„Við verðum bara að bíða og sjá. Það er alveg ljóst að við verðum í 14 daga sóttkví en við vitum þannig séð ekkert nema bara það. Vonandi verða það ekki fleiri en þetta sem greinast með smit og þetta verði því ekki meira en þessir 14 dagar.“

„Ég hef engar áhyggjur að þessum tveimur leikjum sé frestað. Þetta snýst um að hlutirnir fari á sem bestan veg fyrir alla og þá er mér alveg sama þó þessum leikjum hafi verið frestað. Þetta er fúlt og leiðinlegt mál en ef það leystist á þessum tveimur vikum þá hef ég engar áhyggjur. Aðalatriðið er að sem fæstir smitist,“ sagði Þorsteinn.

Þorsteinn veltir þó fyrir sér hvort hann hefði átt að setja leikmanninn í sóttkví við komuna til landsins. Hann hafi spurt sig fram og til baka hvort það hefði verið rétt ákvörðun en Þorsteinn sagði að það væri alltaf auðvelt að vera vitur eftir á. Þá hafi enginn af þeim leikmönnum sem komið hafa til landsins frá því að landamæri landsins voru opnuð 15. júní þurft að fara í sóttkví samkvæmt hans bestu vitneskju.

Nú rétt í þessu gaf Breiðablik frá sér tilkynningu varðandi málið sem lesa má hér að neðan.

Þorsteinn setur ákveðið spurningamerki við að leikur Breiðabliks og Keflavíkur í 32-liða úrslitum Mjólkurbikars karla hafi farið fram á Kópavogsvelli í gær. Annars kvaðst hann nokkuð sáttur með hvernig KSÍ hefði tekið á málinu.

„Ég veit ekki hvað KSÍ gat gert sem slíkt. Held þeir séu bara að afla allra gagna sem þeir geta um hvernig hlutirnir fóru fram en þeir taka enga ákvörðun með sóttkví eða neitt því um líkt Það er kannski spurning með leikinn í gær. Ákvörðun um að spila hann, maður setur kannski spurningamerki við það,“ sagði Þorsteinn að lokum.