Kvöldfréttir Stöðvar 2

Í kvöldfréttum Stöðvar 2 verður fjallað um að íbúar í Hlíðum hafi miklar áhyggjur af fyrirhugaðri staðsetningu smáhýsa við Eskihlíð. Hýsin eru reist fyrir fólk með fíknivanda og á hvergi höfði sínu að halla. Þegar eru tvö önnur félagsleg úrræði fyrir á svæðinu. Íbúar segja að sprautunálar og áfengi finnist þar á víðavangi nær daglega.

Fjórir dagar eru þar til hjúkrunarfræðingar fara í verkfall. Félag hjúkrunarfræðinga hélt félagsfund nú síðdegis og verður rætt við nokkra hjúkrunarfræðinga í fréttatímanum.

Við segjum einnig frá því að 45 prósent Íslands og 39 prósent beitilands lenda í tveimur verstu ástandsflokkunum í nýju mati sem birt var í dag á ástandi gróðurs og jarðvegs á landinu og þá verður einnig fjallað um kórónuveiruna og stöðu faraldursins hér á landi.

Við sjáum einnig nýja flokkunarlínu í Sorpu sem er upphaf þess að hægt verði að hefja tilraunavinnslu í gas- og jarðgerðarstöð fyrirtækisins.

þetta og meira til í kvöldfréttum sem sendar eru út á samtengdum rásum Stöðvar 2, Bylgjunnar og á Vísi klukkan 18:30.