Fylgist með þessum í Pepsi Max-deildinni í sumar

Keppni í Pepsi Max-deild karla hefst á laugardagskvöldið þegar Íslandsmeistarar KR sækja Val heim. Þrír leikir verða á dagskrá á sunnudaginn og 1. umferðinni lýkur svo með tveimur leikjum á mánudaginn. Allir leikirnir í 1. umferðinni verða sýndir beint á Stöð 2 Sport.

Að venju eru margir ungir og spennandi leikmenn í liðunum í Pepsi Max-deildinni sem gætu slegið í gegn í sumar.

Hér fyrir neðan má sjá ellefu leikmenn í Pepsi Max-deildinni sem fótboltaáhugafólk ætti að fylgjast með í sumar.

Hákon Rafn Valdimarsson (Grótta)

18 ára markvörður

Þrátt fyrir að vera aðeins átján ára hefur Hákon varið mark Gróttu undanfarin tvö ár. Hann lék alla 22 leikina þegar Seltirningar unnu Inkasso-deildina á síðasta tímabili. Leikstíll Óskars Hrafns Þorvaldssonar var mjög krefjandi fyrir markverði og Hákon þurfti oft að leysa úr erfiðum stöðum með boltann á fótunum. Yngsti aðalmarkvörðurinn í Pepsi Max-deildinni fær væntanlega nóg að gera í sumar og þarf kannski að sýna hefðbundnari markvarðatakta en áður.

Nökkvi Þeyr Þórisson (KA)

20 ára framherji

KA fékk tvíburana Nökkva Þey og Þorra Mar Þórissyni frá Dalvík/Reyni eftir að liðið vann 3. deildina 2018. Nökkvi, sem skoraði tíu mörk í 3. deildinni 2018, fékk nasaþefinn af Pepsi Max-deildinni á síðasta tímabili. Nökkvi lék þá sautján leiki og skoraði tvö mörk. Hann kom oftast inn á sem varamaður af öllum leikmönnum deildarinnar. Nökkvi verður í enn stærra hlutverki í sumar og verður að leggja sitt af mörkum til að fylla í skarðið sem Elfar Árni Aðalsteinsson skildi eftir sig. Nökkvi er öflugur framherji og erfiður við að eiga.

Þórður Gunnar Hafþórsson (Fylkir)

18 ára miðjumaður

Á að baki þrjú tímabil sem fastamaður í meistaraflokki þrátt fyrir ungan aldur. Þórður lék alla 22 leikina og skoraði fimm mörk þegar Vestri komst upp úr 2. deildinni í fyrra. Var valinn besti ungi leikmaður deildarinnar og var í úrvalsliði hennar. Fylkir samdi svo við Þórð síðasta haust. Stökkið úr 2. deild og upp í Pepsi Max-deildina er stórt en það vantar ekkert upp á hæfileikana hjá Þórði og hann fær væntanlega fullt af mínútum hjá Fylki.

Jóhann Árni Gunnarsson (Fjölnir)

19 ára miðjumaður

Lék alla 22 leikina, skoraði fjögur mörk og var í lykilhlutverki þegar Fjölnir vann sér sæti í Pepsi Max-deildinni á síðasta tímabili. Var valinn í lið ársins í Inkasso-deildinni. Jóhann Árni er gríðarlega mikilvægur í sóknarleik Fjölnis, afar sparkviss og mest skapandi leikmaður liðsins. Fjölnismenn myndu heldur ekki slá hendinni á móti nokkrum mörkum frá honum. Jóhann Árni hefur leikið nítján leiki fyrir yngri landsliðin.

Ari Sigurpálsson (HK)

17 ára framherji

Í dag var greint frá því að Bologna hefði gengið frá kaupunum á Ara frá HK. Hann var lánaður strax aftur til Kópavogsliðsins og leikur með því í sumar. Ari kom við sögu í tveimur leikjum í Pepsi Max-deildinni í fyrra og lék með U-17 ára liði Bologna í vetur. HK er ekki með mikla breidd og Ari ætti því að fá fullt af tækifærum í sumar. Eldsnöggur framherji sem gæti slegið í gegn eins og Valgeir Valgeirsson gerði á síðasta tímabili.

Jón Gísli Eyland Gíslason (ÍA)

18 ára varnarmaður

Skagfirðingurinn verður væntanlega fyrsti kostur Jóhannesar Karls Guðjónssonar, þjálfara ÍA, í stöðu hægri bakvarðar eftir að Hörður Ingi Gunnarsson var seldur til FH. Eftir að hafa verið fastamaður hjá Tindastóli í 2. deildinni í tvö ár, aðeins fimmtán og sextán ára, gekk Jón Gísli til liðs við ÍA í fyrra. Lék tíu leiki í Pepsi Max-deildinni og skoraði fallegt mark í bikarleik ÍA og FH. Stórefnilegur leikmaður sem hefur leikið 32 leiki fyrir yngri landsliðin og vakið athygli erlendra félaga.

Helgi Guðjónsson (Víkingur)

20 ára framherji

Borgfirðingurinn var markahæstur í Inkasso-deildinni í fyrra ásamt Pétri Theodóri Árnasyni hjá Gróttu með fimmtán mörk. Helgi skoraði einnig fjögur mörk í Mjólkurbikarnum. Var valinn besti ungi leikmaður Inkasso-deildarinnar. Víkingar gengu á eftir Helga með grasið í skónum í nokkurn tíma og hann samdi loks við liðið síðasta haust. Ætti að passa vel inn í leikstíl Víkings og vonast er til að hann létti undir með Óttari Magnúsi Karlssyni við að skora mörkin fyrir þá rauðu og svörtu.

Kristófer Orri Pétursson (Grótta)

21 árs miðjumaður

Afar flinkur og vel spilandi miðjumaður með gott auga fyrir sendingum. Kristófer er með góðan vinstri fót og auka- og hornspyrnur hans skiluðu Gróttu mörgum mörkum á síðasta tímabili og verða að gera það áfram í Pepsi Max-deildinni. Nýtur sín best í stöðu fremsta miðjumanns. Kristófer hefur verið í lykilhlutverki í uppgangi Gróttu, leikið 43 af 44 deildarleikjum liðsins undanfarin tvö ár og skorað sjö mörk.

Róbert Orri Þorkelsson (Breiðablik)

18 ára varnarmaður

Fyrsti leikmaðurinn sem Óskar Hrafn fékk til Breiðabliks eftir að hann tók við liðinu. Róbert er einn af nokkrum ungum og spennandi leikmönnum sem hafa komið upp í Mosfellsbænum á undanförnum árum. Var fastamaður hjá Aftureldingu í tvö ár áður en hann fór til Breiðabliks. Í fyrra lék Róbert nítján leiki og skoraði þrjú mörk í Inkasso-deildinni. Lék á miðjunni hjá Aftureldingu en er hugsaður sem vinstri miðvörður í þriggja manna vörn Breiðabliks. Hefur leikið 23 yngri landsleiki og var í mjög sterku U-17 ára liði Íslands sem komst á EM í fyrra. 

Stefán Árni Geirsson (KR)

19 ára miðjumaður

Finnur Tómas Pálmason sló í gegn með KR í fyrra og í ár gæti röðin verið komin að Stefáni Árna. Lék stórvel sem lánsmaður með Leikni R. á síðasta tímabili og var valinn í lið ársins í Inkasso-deildinni þar sem hann lék átján leiki og skoraði fjögur mörk. Stefán Árni lék talsvert með KR á undirbúningstímabilinu og var í byrjunarliði Íslandsmeistaranna gegn Víkingi í Meistarakeppninni á sunnudaginn. Þar sýndi hann góða takta og að honum er treystandi fyrir hlutverki í ógnarsterku liði KR-inga.

Hallvarður Óskar Sigurðarson (Fjölnir)

21 árs framherji

Hallvarður kemur úr mikilli fótboltafjölskyldu. Faðir hans, Sigurður Hallvarðsson heitinn, var mikill markaskorari og eldri bróðir hans, Aron, sló í gegn með Fjölni áður en hann fór í atvinnumennsku. Hallvarður fékk sín fyrstu tækifæri með Fjölni í Pepsi-deildinni 2018 og lék svo tíu leiki í Inkasso-deildinni í fyrra. Verður í stóru hlutverki hjá nýliðunum í sumar. Fjölnir er ekki með eiginlegan framherja í sínum leikmannahóp og því þyrfti Hallvarður helst að skora nokkur mörk í sumar.