Ekkert bendi til veikinda hjá Kim Jong-un

Engar vísbendingar eru um að Kim Jong-un, leiðtogi Norður-Kóreu, sé alvarlega veikur, eða þá að hann hafi gengist undir hjartaaðgerð.

Reuters segir frá því að þetta komi fram í skýrslu suður-kóresku leyniþjónustunnar sem kynnt var suður-kóreskum þingmönnum á lokuðum fundi í dag.

Fréttir bárust af því um helgina að Kim hafi heimsótt nýja áburðarverksmiðju, en hann hafði fyrir það ekki látið sjá sig opinberlega í einhverja tuttugu daga. Vakti það sérstaka athygli að hann var fjarverandi þegar haldið var upp á afmælisdag afa síns og fyrrverandi einræðisherra landsins, Kim Il-sung.

Í kjölfarið var því velt upp hvort að Kim væri mögulega alvarlega veikur eða jafnvel látinn. Þær fréttir áttu þó ekki við rök að styðjast að mati suður-kóresku leyniþjónustunnar. Þyki líklegra að Kim hafi dregið úr því að koma fram opinberlega á þessum tímum vegna útbreiðslu kórónuveirunnar.