Búa sig undir enn eina hitabylgjuna

Slökkviliðsmenn í Ástralíu búa sig nú undir enn eina hitabylgjuna í landinu en undanfarnar vikur hafa kjarr- og skógareldar haft gríðarlega eyðileggingu í för með sér.

Að sögn veðurfræðinga verður hitinn rúmlega fjörutíu gráður víða um landið og sérstaklega á þeim svæðum sem þegar hafa orðið hvað verst úti í eldunum, líkt og í New South Wales og Victoria.

Nú þegar brenna um hundrað eldar víðsvegar um landið, sá stærsti vestur af stórborginni Sydney. Í síðustu viku féllu hitamet í landinu tvo daga í röð, þegar hitinn fór mest í 41,9 gráður að meðaltali í landinu öllu.