Danir fá góðar fréttir af Lasse Svan

Ellefu af nítján leikmönnum í danska landsliðshópnum í handbolta spila með liðum í Þýskalandi.

Danir verða mótherjar Íslendinga í fyrsta leiknum í E-riðli Evrópumótsins í handbolta í Malmö 11. janúar. Evrópumótið fer núna fram í 14. sinn. Í fyrsta sinn verður keppnin haldin í þremur löndum (Austurríki, Noregi og Svíþjóð) og í fyrsta skiptið verða keppnisliðin 24.  

Líkt og Guðmundur Guðmundsson er Nikolaj Jakobsen þjálfari Dana búinn að velja 19 manna hóp en Danir fara með 18 leikmenn til Malmö. Hornamaðurinn Lasse Svan Hansen meiddist með SG Flensburg-Handewit gegn Ludswigshaven í þýsku Bundesligunni 19. desember og lék ekki síðustu tvo leiki þýska liðsins. Í samtali við Flensburg Avis segist Lasse Svan á góðum batavegi og gerir ráð fyrir því að hann geti spilað á EM.

Landsliðsþjálfararnir eru búnir að tilkynna til evrópska handknattleikssambandins nöfn þeirra 28 leikmanna sem geta spilað í keppninni. Sú breyting er einnig á keppninni núna að leyft er að gera fleiri breytingar en áður. Þjálfarnir geta skipt út tveimur leikmönnum í riðlakeppni, tveimur í milliriðlum og einni tveimur leikmönnum úrslitahelgina.    

Danir koma saman til æfinga á morgun en 11 þeirra sem eru í 19 manna hópnum spila með liðum í Þýskalandi. Átta leikir verða í síðustu umferðinni fyrir EM fríið í Bundesligunni á sunnudag.

Danir hafa unnið Evrópumeistaratitilinn tvisvar (2008 og 2012), silfurverðlaun (2014) og þrenn bronsverðlaun (2002, 2004 og 2006).

EM hópur Dana

Markverðir

Niklas Landin (THW Kiel)

Jannick Green (SC Magdeburg)

Hornamenn:

Magnus Landin (THW Kiel)

Magnus Bramming (TTH Holstebro)

Lasse Svan Hansen (Flensburg-Handewitt)

Hans Lindberg (Füchse Berlin)

Línumenn:

René Toft Hansen (S.L. Benfica)

Magnus Saugstrup (Aalborg Håndbold)

Anders Zachariassen (Flensburg-Handewitt)

Skyttur og leikstjórnendur

Niclas Kirkeløkke (Rhein-Neckar Löwen)

Mikkel Hansen (PSG Paris)

Henrik Møllgaard (Aalborg Håndbold)

Mads Mensah Larsen (Rhein-Neckar Löwen)

Rasmus Lauge (Vészprem KC)

Morten Olsen (TSV Hannover-Burgdorf)

Jacob Holm (Füchse Berlin)

Michael Damgaard (SC Magdeburg)

Lasse Andersson (FC Barcelona)

Nikolaj Øris (Bjerringbro-Silkeborg)