Drukkinn ferðamaður með of marga farþega

Lögreglan á höfuðborgarsvæðinu stöðvaði ökumann í vesturbæ Reykjavíkur um klukkan tvö í nótt. Ökumaðurinn reyndist erlendur ferðamaður, að því er segir í dagbók lögreglu, og er grunaður um ölvunar- og fíkniefnaakstur. Þá voru einnig of margir farþegar í bílnum.

Á níunda tímanum í gærkvöldi var bíll stöðvaður í Laugardalnum. Ökumaðurinn er grunaður um akstur bifreiðar undir áhrifum fíkniefna, vörslu slíkra efna og brot á vopnalögum. Þá ók hann einnig sviptur ökuréttindum.

Þá stöðvaði lögregla erlendan ferðamann á Reykjanesbraut við Hvassahraun á 126 kílómetra hraða þar sem hámarkshraði er 90 km/klst. Ferðamaðurinn var sektaður og hann greiddi sektina um hæl, að því er segir í dagbók lögreglu.

Sautján ára stúlka var stöðvuð í Árbæ skömmu fyrir miðnætti í gær vegna gruns um akstur bifreiðar undir áhrifum fíkniefna. Þá hafði hún aldrei öðlast ökuréttindi. Í dagbók lögreglu segir að málið hafi verið afgreitt með aðkomu móður stúlkunnar og tilkynningu til Barnaverndar. 

Þá var maður handtekinn á heimili í Kópavogi í gærkvöldi grunaður um vörslu og ræktun fíkniefna. Lögregla lagði hald á efni, plöntur og búnað til slíkrar iðju á heimilinu. Maðurinn var látinn laus að lokinni skýrslutöku.