Framlengingin: Njarðvík aldrei að fara að falla

Keflvíkingar eru alvöru meistaraefni, Njarðvíkingar falla ekki og bæði Grindvíkingar og Haukar geta farið á flug. Þetta sögðu sérfræðingar Domino's Körfuboltakvölds í Framlengingunni.

Framlengingin er liður þar sem málefni liðinnar stundar eru rædd.

Grindavík er loks komið á sigurbraut og er búið að vinna tvo sigra í röð. Sérfræðingarnir voru á þeim bókunum að Grindvíkingar hefðu efni í að skáka efstu liðunum.

„Þeir eru með einstaklingana, það vantar það ekki,“ sagði Hermann Hauksson.

Njarðvík hefur líka átt í basli en eru þó ekki í hættu á því að falla úr deildinni.

„Þeir eru með allt of mikinn og flottan grunn í það. Þeir þurfa bara að finna sinn takt,“ sagði Fannar Ólafsson.

„Ekki séns þeir séu að fara að falla.“

Hermann Hauksson tók undir það. „Ef ég horfi á Njarðvíkurliðið þá er það aldrei að fara að falla, það er líklegra að þeir spýti í lófana og fari í úrslitakeppnina.“

Alla umræðuna má sjá hér að neðan.