Loka veginum um Fjarðarheiði vegna umferðaróhapps

Umferðaróhapp varð í dag við Norðurbrún á Fjarðarheiði þegar flutningabifreið fór út af veginum og valt. Loka þarf veginum um tíma á morgun, miðvikudag, á meðan bílnum verður komið upp á hann aftur, að því er fram kemur í tilkynningu frá lögreglu á Austurlandi.

Ökumaður bifreiðarinnar slasaðist ekki í óhappinu. Reikna má með að veginum verði lokað eða umferð um hann takmörkuð um eða upp úr hádegi í óákveðinn tíma. Koma þarf bæði bifreiðinni og vagni hennar upp á veginn.

Lögreglan á Austurlandi mun veita nánari upplýsingar á Facebook-síðu sinni þegar nær dregur.