Markaðssetja þurfi vannýtt svæði á landsbyggðinni

Stjórnvöld verða að móta sér stefnu til framtíðar um alþjóðaflug, tengiflug og markaðssetningu á áfangastaðnum Íslandi. Þetta er á meðal tíu tillagna sem Samtök Ferðaþjónustunnar kynntu á fundi sínum í morgun til að efla ferðaþjónustu á landsbyggðinni.

Breytt samkeppnisstaða Íslands hefur valdið því að samsetning ferðamanna og ferðahegðun á Íslandi hefur tekið breytingum. Slíkar sveiflur hafa ekki síst þrengt að ferðaþjónustufyrirtækjum á landsbyggðinni.

Hvers vegna fundu þið ykkur knúin til að ræða sérstaklega um þetta. Kvíða margir komandi misserum á landsbyggðinni?

„Það er náttúrulega þannig að ferðaþjónustulandið Ísland er allt landið. Það er eins með þetta og margt annað í stjórnkerfinu og stjórnsýslunni sem gerir það að verkum að landsbyggðin á undir högg að sækja. Það er eðlilega má segja kannski dags daglega meiri fókus á það svæði landsins þar sem flestir búa og flest fyrirtæki starfa og svo framvegis.

Það þýðir það að horfa þarf sérstaklega til þess að skoða það sem þarf að gera á öðrum landshornum til þess að byggja upp þessa starfsemi sem hefur verið alveg gríðarlega mikill vaxtarbroddur í atvinnulífi, atvinnutækifæri auknum lífsgæðum á landsbyggðinni,“ segir Jóhannes Þór Skúlason, framkvæmdastjóri Samtaka ferðaþjónustunnar.

Aðspurður hvaða þætti þurfi sérstaklega að skoða segir Jóhannes.

„Það þarf að skoða alls konar þætti, rekstrarumhverfi fyrirtækjanna, samkeppnishæfni þeirra, horfa þarf á hvernig vegasamgöngum er háttað, hvernig ákvarðanir eru teknar um samgöngumál og hvernig stjórnsýsla samgöngumálanna er og að hún taki meira mið að þörfum ferðaþjónustunnar.“

Hér að neðan er hægt að horfa á fund Samtaka ferðaþjónustunnar í heild sinni.

Á fundinum í morgun sagði Jóhannes að leggja þyrfti aukna áherslu á markaðssetningu á vannýtt svæði á landsbyggðinni.

„Þó að orðalagið vannýtt landsvæði sé ekkert sérstaklega skemmtilegt að þá er það nákvæmlega það sem um er að ræða, það er að segja, hér eru tækifæri um allt land til þess að búa til ferðamannaleiðir, til að byggja upp áfangastaði, nýja segla eins og við tölum gjarnan um í ferðaþjónustunni, sem dregur ferðamanni lengra út á land og veldur því þá líka að álagið léttist á þeim stöðum á landinu þar sem mikið álag.

Þetta vinnur allt saman. Við teljum að það sé hægt að horfa til þess hvernig má með heildstæðri stefnu byggja upp leiðir á fleiri stöðum á landinu, fleiri landsvæðum sem hafa kannski búið við það að fá ekki nema 20-30% af þeim ferðamannastraumi sem kemur til landsins á hverju ári.“

En einhvern veginn þurfa ferðamenn að komast á milli stað og lengra út á landsbyggðina. Íbúar á bæði Akureyri, Egilstöðum og Ísafirði hafa lengi kallað eftir flugvallauppbyggingu og að stefna sé mótuð um alþjóðaflug.

Sjá nánar: Beint flug stærsta hagsmunamál ferðaþjónustunnar á landsbyggðinni

„Flugsamgöngurnar eru eitthvað sem eru mikið í umræðunni og bæði út frá hagsmunum heimamanna, sérstaklega á landsbyggðinni, og síðan frá hagsmunum ferðaþjónustunnar og við höfum í einhver ár velt því fyrir okkur hvers vegna ferðamenn nota ekki flug innanlandsflugið meira.

Þar er verðið náttúrulega einhver hindrun en ekki síður kannski sú staðreynd að við erum með innanlandsflug og alþjóðaflug á sitt hvorum flugvellinum og enga tengingu á milli,“ segir Jóhannes Þór.