Spennt að fá að flytja ræðuna og taka þátt í nefndarstörfum

Esther Hallsdóttir er stödd á allsherjarþingi Sameinuðu þjóðanna í New York en hún er þar sem fulltrúi íslenskra ungmenna. Í dag tekur Esther þátt í loftlagsráðstefnu fyrir ungmenni, Youth Climate Summit, þar sem þúsund ungmenni alls staðar að úr heiminum koma saman og ræða aðgerðir fyrir loftslagið.

„Ég kom hingað í gær og verð til 5.október. Þetta er alveg magnað. Það eru hérna rúmlega þúsund ungmenni alls staðar að úr heiminum sem að voru valin til þess að mæta á þessa ráðstefnu og svo er ungmennafullrúum landanna boðið líka,“ segir Esther í samtali við Vísi. Blaðamaður náði tali á Esther þar sem hún var stödd í höfuðstöðvum Sameinuðu þjóðanna.

Esther er 24 ára gömul og starfar hjá UNICEF á Íslandi sem verkefnastjóri í fjáröflun. Hún er með BA gráðu í mannfræði frá Háskóla Íslands og tók þátt í hagsmunabaráttu stúdenta með Stúdentaráði. Hún segist vera búin að vera að undirbúa sig og kynna sér málefnin og Sameinuðu þjóðirnar síðan hún var kosin í þetta hlutverk í ágúst.

„Ég var kosin ungmennafulltrúi Íslands hjá Sameinuðu þjóðunum af aðildarfélögum Landssambands ungmennafélaga, LUF.“ Esther er fyrsti slíki fulltrúi íslands hjá samtökunum.

Skref í rétta átt

„Ég mun verða með ræðu í þriðju nefnd allsherjarþingsins. Núna í fyrri vikunni er meira um að þjóðarleiðtogar séu að koma. Í seinni vikunni þá byrjar nefndarstarfið. Við ungmennafulltrúarnir munum taka þátt í störfum þriðju nefndarinnar sem að snýr meðal annars að mannréttindarmálum. Ég mun vera með ræðu fyrir þeirri nefnd.“

Esther segir að ræðan muni meðal annars koma inn á mikilvægi þess að ungt fólk fái að koma að því að taka ákvarðanir.  

„Bæði í málefnum sem að varða þau en líka samfélagið í heild. Það að Ísland sé að senda núna í fyrsta skipti ungmennafulltrúa á Allsherjarþing Sameinuðu þjóðanna er náttúrulega stórt skref í rétta átt. Þetta prógramm sem Sameinuðu þjóðirnar eru með er náttúrulega til þess að ungt fólk fái að taka þátt og koma að ákvarðanatöku og umræðu á þessu alþjóðlega stigi. Ræðan mun því aðallega fjalla um það en svo mun ég líka koma inn á mál eins og loftlagsmál og jafnrétti og fleira.“

Esther segir að það sé mjög gaman að fá að sitja þessa stóru viðburði og segir að hún sé mjög spennt að fá að taka þátt í nefndarstörfum í næstu viku.

„Að fá tækifæri til þess að koma að því að það verða gerðar ályktanir gerðar um ungt fólk meðal annars og við fáum að koma að þeirri vinnu. Fæ ég líka tækifæri til að ávarpa nefndina og það er mikið tilhlökkunarefni.“

Hlustað á unga fólkið

Loftslagsaðgerðarsinninn Greta Thunberg er einnig á Allsherjarþinginu. Hin 16 ára Greta hefur vakið heimsathygli fyrir skólaverkfall sitt fyrir loftslagsaðgerðum sem hefur breiðst út til fjölda landa. Barack Obama, fyrrverandi forseti Bandaríkjanna, lýsti táningsstúlkunni sem einum öflugasta málsvara plánetunnar eftir að þau hittust fyrr í vikunni.

„Hún var í pallborði hérna áðan og þar var líka aðalritari Sameinuðu þjóðanna. Greta og þrír aðrir voru í pallborðinu og hann var það sem er kallað „keynote listener“ þar sem hann var að hlusta á unga fólkið og þeirra lausnir og það sem þau höfðu að segja,“ segir Esther og bætir við að það hafi verið mjög áhugavert að hlusta á Gretu.

„Greta verður með ræðu á mánudaginn á stóru loftlagsráðstefnunni sem að ég fæ að sitja. Katrín Jakobsdóttir verður svo með ræðu þar líka.“

Esther segist vera full innblásturs eftir að hlusta á allt unga fólkið sem hefur talað á þinginu.

„Það er mikill kraftur hérna inni.“