Ein milljón heyrnartóla fyrir börn seld

Félagið Nordic Enterprises Ltd, sem er að mestu í eigu Íslendinga í Hong Kong og framleiðir heyrnartól í Shenzhen fyrir börn, hefur tryggt sé jafnvirði 125 milljóna króna til að fjármagna vöxt fyrirtækisins.

Samkvæmt upplýsingum frá Centra Fyrirtækjaráðgjöf sem annaðist fjármögnunina þá selur Nordic Enterprises vörur sínar aðallega í Kína og Bandaríkjunum. Frumkvöðlarnir að baki félaginu eru Bjarki Garðarsson og Pétur Ólafsson sem er framkvæmdastjóri félagsins.

Nordic Enterprises hefur þegar selt yfir eina milljón heyrnartóla sem ætluð eru börnum. „12,5 prósent barna á aldrinum 6-19 ára hafa hlotið eyrnaskaða vegna hlustunar með heyrnartólum með of háum hljóðstyrk og félagið snýst um hönnun, framleiðslu og sölu á heyrnartólum fyrir börn og unglinga,“ segir í tilkynningu. Framleitt er undir merkinu buddyphones.

Tekjur Nordic Enterprises í fyrra eru sagðar hafa verið um 4,3 milljónir Bandaríkjadala og tekjurnar á þessu ári eru áætlaðar 6,3 milljónir dala, eða jafnvirði um 790 milljóna króna.

„Stærstu viðskiptavinirnir eru Target og Amazon, en varan er í dreifingu í 60 löndum. Félagið er búið að selja yfir 1 milljón eintaka af heyrnartólum til þessa. Framtíðarhorfur félagsins eru góðar og spennandi tækifæri til vöruþróunar,“ segir í tilkynningu Center Fyrirtækjaráðgjafar. „Á árinu 2020 er stefnt að því að sækja fimm milljónir Bandaríkjadala til að fjármagna tækniþróun sem beinist meðal annars að ofvirkum og einhverfum börnum.“