Grafa lík kafteins gegn vilja fjölskyldu hans

Stjórnvöld í Venesúela grófu lík kafteins í sjóhernum sem lést í varðhaldi í síðasta mánuði, þvert á óskir ættingja hans. Fjölskylda kafteinsins krefst sjálfstæðrar krufningar á líki hans og heldur því fram að hann hafi verið pyntaður til bana.

Rafael Acosta, kafteinn í venesúelska sjóhernum, var handtekinn 21. júní og sakaður um að hafa tekið þátt í valdaránstilraun gegn Nicolas Maduro, forseta. Hann lést viku síðar í haldi herleyniþjónustunnar. Lögmenn fjölskyldunnar fullyrða að lík hans hafi borðið þess merki að gengið hafi verið í skrokk á honum.

Ríkisstjórn Maduro hefur ekki tjáð sig um ásakanir um að Acosta hafi verið pyntaður í varðhaldinu. Lögmaður Acosta-fjölskyldunnar segist túlka ákvörðun stjórnvalda um að grafa lík hans sem viðurkenningu á að þau hafi valdið dauða hans, að því er segir í frétt Reuters.

Niðurstaða opinberrar krufningar á líki Acosta í Venesúela var sögð hafa leitt í ljós að hann hafi látist af völdum fjölda áverka. Ekkja hans vill að stjórnvöld skili líki hans og hefur beðið Sameinuðu þjóðirnar um að rannsaka dauða hans.