Úr­skurðaður í fjögurra vikna gæslu­varð­hald

Saksóknarar fara fram á fjögurra vikna gæsluvarðhald vegna hnífstungu í heimahúsi í Neskaupstað í nótt. Beðið er nú úrskurðar dómara.

Farið er fram á gæsluvarðhaldið á grundvelli almannahagsmuna en málið er rannsakað sem tilraun til manndráps.  

Jónas Vilhelmsson yfirlögregluþjónn sagði í samtali við fréttastofu fyrr í dag að málið væri í rannsókn en sá sem varð fyrir árásinni var fluttur með sjúkraflugi á Landspítalann í Reykjavík. Maðurinn gekkst undir aðgerð og er líðan hans sögð stöðug.

Enn er lítið vitað um málsatvik en tæknideild Lögreglunnar á höfuðborgarsvæðinu aðstoðar við rannsóknina.

Uppfært klukkan 17:54: Fallist var á gæsluvarðhaldsbeiðni og var maðurinn úrskurðaður í fjögurra vikna gæsluvarðhald vegna málsins.