Robben leggur skóna á hilluna

Hollendingurinn magnaði, Arjen Robben, tilkynnti í dag að hann hefði ákveðið að henda knattspyrnuskónum upp í hillu.

Robben er orðinn 35 ára gamall og átti ákaflega farsælan feril. Enginn Hollendingur hefur unnið eins marga landstitla. Hann vann átta með Bayern í Þýskalandi, tvo með Chelsea og svo einn með Real Madrid og PSV í heimalandinu.

Hann hóf ferilinn hjá Groningen en fór til PSV árið 2002. Eftir tvö ár þar lá leiðin yfir til Chelsea þar sem hann spilaði í þrjú ár.

Real Madrid keypti hann árið 2007 og þar náði hann tveimur tímabilum. Hann spilaði svo í tíu ár með Bayern áður en skórnir fóru í hilluna í dag.

Robben lék þess utan 96 landsleiki fyrir Holland og skoraði í þeim leikjum 37 mörk.