Sebastian: Ekki hægt að endurtaka sama hlutinn aftur og aftur og búast við annarri niðurstöðu

Sebastian Alexandersson, fyrrverandi landsliðsmarkvörður í handbolta og sérfræðingur Seinni bylgjunnar, er á því að Guðmundur Guðmundsson hafi gert rétt þegar hann skipti um markvarðapar fyrir seinni leikinn gegn Norður-Makedóníu í undankeppni EM 2020.

Björgvin Páll Gústavsson og Aron Rafn Eðvarðsson náðu sér ekki á strik í tapinu fyrir Norður-Makedóníu, 33-34, á miðvikudaginn. Guðmundur skipti þeim út og Ágúst Elí Björgvinsson og Viktor Gísli Hallgrímsson munu verja mark Íslands í Skopje á sunnudaginn.

„Mér finnst þetta rétt ákvörðun. Við höfum engu að tapa. Mér finnst allt í lagi að ýta við hinum tveimur og vonandi svara þeir með frábærri frammistöðu. Getan er til staðar,“ sagði Sebastian í samtali við Vísi í dag.

Ágúst Elí hefur farið á síðustu tvö stórmót en leikurinn á sunnudaginn verður fyrsti keppnisleikur Viktors Gísla með landsliðinu.

Vonandi sýna þeir að þetta var ekki góð ákvörðun

„Ágúst átti frábæra innkomu á HM og ég hefði viljað sjá hann í hóp á miðvikudaginn. Það er búið að tala lengi um Viktor Gísla sem framtíðarmarkvörð. Ef drengurinn ætlar í atvinnumennsku er þetta góð eldskírn. Ég hef spilað í Makedóníu og það er erfitt en mjög skemmtilegt,“ sagði Sebastian og bætti við að Ágúst Elí myndi að öllum líkindum byrja leikinn á sunnudaginn.

Björgvin Páll hefur verið aðalmarkvörður íslenska landsliðsins í rúman áratug og Aron Rafn hefur farið á sex stórmót með því.

„Það er búið að reyna þetta frekar lengi með misjöfnum árangri. Það versta sem gerist er að tilraunin mistekst,“ sagði Sebastian.

„Ég fagna allavega breytingunni. Eitthvað þurfti að gera. Það er ekki hægt að endurtaka sama hlutinn aftur og aftur og búast við annarri niðurstöðu. Vonandi hysja hinir upp um sig buxurnar og sýna að þetta var ekki góð ákvörðun. Ef ég væri þeir væri ég foxillur og gæti ekki beðið eftir því að spila næsta leik.“

Tomas Svensson hefur verið í þjálfarateymi íslenska liðsins síðan Guðmundur tók við því í fyrra. Sebastian segist eiga erfitt með að tjá sig um störf sænska markvarðaþjálfarans.

„Ég get eiginlega ekki tjáð mig um það. Kannski er hann að vinna toppvinnu sem skilar sér ekki inn á völlinn. Ég efast ekki um að maðurinn er fær,“ sagði Sebastian.

Fá á sig óþarfa mörk

Sem þrautreyndum markverði fannst honum erfitt að horfa á Norður-Makedóna skora úr nánast hverju einasta skoti sem fór á íslenska markið á miðvikudaginn.

„Mér finnst þeir stundum fá á sig óþarfa mörk. Hægri hornamaðurinn hjá Norður-Makedóníu [Goce Georgievski] skaut t.a.m. alltaf á nærstöngina og skoraði. Manni er ungum kennt að ef leikmaður setur boltann tvisvar á sama stað prófarðu eitthvað annað næst. Þú þarft að bregðast við,“ sagði Sebastian.

„Í langskotum fara þeir stundum í rétt horn en boltinn fer samt inn. Það er eins og það vanti smá greddu,“ bætti hann við.

Leikur Norður-Makedóníu og Íslands á sunnudaginn hefst klukkan 18:00. Ísland mætir svo Grikklandi og Tyrklandi í síðustu tveimur leikjum sínum í undankeppninni í júní.