Fjármálastjóri verður framkvæmdastjóri

Arnar Gauti Reynisson hefur verið ráðinn framkvæmdastjóri Heimavalla hf.

Hann hefur verið fjármálastjóri Heimavalla frá maí 2015 og samkvæmt upplýsingum frá Erlendi Magnússyni, stjórnarformanni, mun hann áfram gegna þeirri stöðu meðfram framkvæmdastjórastörfum - alla vega fyrst um sinn. Hann tekur formlega við stöðu framkvæmdastjóra þann 1. apríl næstkomandi.

Tilkynnt var um brotthvarf fráfarandi framkvæmdastjóra, Guðbrands Sigurðssonar, í lok janúar. Gert var samkomulag um að hann myndi gegna starfi framkvæmdastjóra út marsmánuð.

Í tilkynningu Heimavalla er ferill Arnars Gauta rakinn. Þar segir að hann sé með gráðu í iðnaðarverkfræði frá University of Minnesota og hafi lokið prófi í verðbréfaviðskiptum.

Hann hefur verið einn af af þremur stjórnendum Heimavalla og „tekið virkan þátt í uppbyggingu félagsins á síðastliðnum 4 árum,“ eins og það er orðað. Áður en Gauti hóf störf hjá Heimavöllum starfaði hann sem sérfræðingur í markaðsviðskiptum hjá Íslandsbanka.

Haft er eftir Arnar Gauta að hann sé spenntur fyrir komandi verkefnum. „Félagið hefur stækkað hratt á undanförnum árum og er stærsta íbúðaleigufélag landsins með um 1.800 íbúðir í leigu. Á næstunni verður enn frekari áhersla lögð á umbreytingu eignasafns félagins sem miðar af því að bæta rekstur þess og arðsemi."