Falllið með flesta þrista í Domino´s deild karla í vetur

Blikarnir eru fallnir úr Domino´s deild karla í körfubolta en það breytir því ekki að þeir eru „besta“ þriggja stiga skotlið deildarinnar.

Ekkert lið í deildinni hefur nefnilega skorað fleiri þrista en Blikar í deildinni í vetur. Blikar skoruðu tíu þrista á Sauðárkróki í gær og hafa skorað tíu þrista eða fleiri í fimmtán af tuttugu deildarleikjum sínum í vetur.

Breiðablik hefur alls skorað 236 þriggja stiga körfur í 20 leikjum eða 11,8 að meðaltali í leik. Tindastólsliðið skoraði sex fleiri þrista í gær og er nú þremur þristum á eftir Kópavogsliðinu.

Hitt falliðið, Skallagrímur, rekur aftur á móti lestina með aðeins 153 þrista eða 83 þristum færra en Breiðablik. Blikar eru því að skora fjóra fleiri þrista í leik en Borgnesningar.

Blikar eru reyndar bara í áttunda sæti yfir bestu þriggja stiga nýtinguna en þeir hafa sett niður 32,1 prósent þriggja stiga skota sinna á tímabilinu. Ekkert lið hefur reynt fleiri þriggja stiga skot en einmitt Blikar.

Flestar þriggja stiga körfur í Domino´s deild karla 2018-19:

1. Breiðablik 236

2. Tindastóll 233

3. Stjarnan 217 (19 leikir)

4. Njarðvík 211

5. Grindavík 204

6. Keflavík 200

7. Valur 197

8. Þór Þ. 194

9. KR 190 (19 leikir)

10. ÍR 169

11. Haukar 161

12. Skallagrímur 153

Leikmenn Breiðabliks með fleiri en tíu þrista í vetur:

1. Christian Covile     Breiðablik     35

2. Árni Elmar Hrafnsson     Breiðablik     34

3. Erlendur Ágúst Stefánsson     Breiðablik     33

4. Snorri Vignisson     Breiðablik     29

5. Hilmar Pétursson     Breiðablik     27

6. Kofi Omar Josephs     Breiðablik     20

7. Bjarni Geir Gunnarsson     Breiðablik     19

8. Arnór Hermannsson     Breiðablik     12