Búið er að yfirheyra manninn sem grunaður er um að hafa ráðist á tvær ungar konur um hádegisbil í gær. Manninum hefur verið sleppt úr haldi og hafa báðar árásir verið kærðar til lögreglu.
Sjá einnig: Vitni lýsir hrottalegri árás á unga konu við Háaleitisbraut
Guðmundur Páll Jónsson lögreglufulltrúi hjá lögreglunni á höfuðborgarsvæðinu segir í samtali við Vísi að stuttur tími hafi liðið á milli árásanna. Maðurinn hafi fyrst ráðist á unga konu við gatnamót Suðurlandsbrautar og Vegmúla. Þaðan lá leið hans að Háaleitisbraut, þar sem hann réðst á aðra unga konu.
Ekki var unnt að yfirheyra manninn í gær sökum annarlegs ástands en það náðist svo í dag. Manninum hefur verið sleppt úr haldi en hann hefur áður komið við sögu lögreglu.
Vitni að seinni árásinni lýsti henni í gær sem „hrottalegri“ og sagði manninn hafa ráðist á konuna, sem var ökumaður bíls, eftir að bifreið hennar skagaði örlítið inn á gangbraut. Þá hafi maðurinn hent konunni inn í runna og stappað á henni.
Guðmundur Páll gat ekki staðfest þessa lýsingu á atburðarásinni en sagði rannsóknina m.a. hverfast um skýrslutökur af vitnum.
Sleppt úr haldi eftir tvær árásir á ungar konur
Tengdar fréttir
Óska eftir vitnum að líkamsárás við gatnamót Vegmúla og Suðurlandsbrautar
Karlmaður veittist að ungri konu á mótum Vegmúla og Suðurlandsbrautar í Reykjavík í dag. Lögreglan óskar eftir vitnum.
Handtekinn við Háaleitisbraut eftir árás á unga konu
Karlmaður í annarlegu ástandi var handtekinn við Háaleitisbraut í hádeginu í dag, grunaður um að hafa sparkað í bíl og svo í kjölfarið ráðist á ökumanninn, unga konu.
Vitni lýsir hrottalegri árás á unga konu við Háaleitisbraut
Karlmaður sem handtekinn var fyrir líkamsárás við gatnamót Háaleitisbrautar og Kringlumýrarbrautar um hádegisbil í dag verður yfirheyrður á morgun.
