Jón stjórnarformaður Vitrolife

Stjórn Vitrolife hefur lagt til að Jón Sigurðsson, forstjóri Össurar, verði kjörinn stjórnarformaður sænska líftæknifyrirtækisins á aðalfundi fyrirtækisins sem verður haldinn í byrjun maí næstkomandi. Jón hefur setið í stjórn þess frá árinu 2015.

Fram kemur í tilkynningu frá félaginu, sem er skráð á hlutabréfamarkað í Stokkhólmi, að Carsten Browall, stjórnarformaður þess til sex ára, muni stíga til hliðar á aðalfundinum.

Stærsti hluthafi Vitrolife, sem þróar og selur ýmsar heilbrigðisvörur, er danska fjárfestingafélagið William Demant með 22 prósenta hlut en félagið er jafnframt stærsti hluthafi Össurar með 51 prósents hlut. Markaðsvirði félagsins er um 20 milljarðar sænskra króna. – kij