Gríðarstór gælukrókódíll varð konu að bana

Stór krókódíll, sem haldinn var ólöglega sem gæludýr á indónesísku eyjunni Sulawesi, varð konu að bana fyrr í mánuðinum. BBC greinir frá.

Samkvæmt frétt BBC var konan, hin 44 ára gamla Deasy Tuwo, að gefa krókódílnum að éta þegar hún féll í laug hans. Krókódíllinn, sem heitir Merry og vegur 700 kíló, réðst á konuna, beit af henni handlegginn og reif hana á hol.

Tuwo var yfirmaður rannsóknarstofu við perluframleiðslu á Sulawesi, þar sem krókódílnum var haldið án tilskilins leyfis. Samstarfsmenn Tuwo fundu lík hennar í laug krókódílsins 11. janúar síðastliðinn en hún er talin hafa fallið í laugina daginn áður.

Krókódíllinn var fluttur á náttúruverndarsvæði í nágrenninu og verður þar á meðan yfirvöld hafa uppi á eiganda hans, japönskum ríkisborgara. Þá er haft eftir yfirvöldum að ítrekað hafi verið reynt að fjarlægja krókódílinn af lóð perluframleiðslunnar en opinberum starfsmönnum hafi í öll skiptin verið meinaður aðgangur að svæðinu.