Berglind Festival til Símans

Fjölmiðlakonan Berglind Pétursdóttir hóf í dag störf fyrir fjarskiptafyrirtækið Símann. Þar mun Berglind starfa í markaðsdeild fyrirtækisins, þar sem ætla má að reynsla hennar af auglýsinga- og markaðsstarfi muni nýtast vel.

Berglind skaust fyrst fram á sjónarsviðið með vefsíðu sinni The Berglind Festival þar sem hún birti stuttar, glettnar færslur með hvers kyns hreyfimyndum. Þegar síðunnar hætti að njóta við flutti hún grín sitt yfir á Twitter þar sem færslur hennar hafa notið mikilla vinsælda.

Það var einmitt í einni slíkri færslu sem hún greindi frá vistaskiptunum, en hana má sjá hér að neðan.

Undanfarin ár hefur Berglind starfað í auglýsingageiranum, nú síðast hjá Tjarnargötunni. Þar hóf hún störf þann 1. maí síðastliðinn. Þar áður hafði hún starfað hjá auglýsingastofunum ENNEMM og Íslensku auglýsingastofunni, auk þess sem hún hefur skrifað pistla í Fréttablaðið.

Frægðarsól hennar reis þó hæst eftir að hún var fengin til að vera með stutt innslög í kvöldþætti Gísla Marteins Baldurssonar, Vikan með Gísla Marteini, sem sýndur er í Ríkissjónvarpinu.

Fyrsti dagurinn í kaktusabúðinni. pic.twitter.com/p7pxWwWnpp

— Berglind Festival (@ergblind) January 2, 2019