Nýkjörinn þingmaður fær ekki sæti á Bandaríkjaþingi í skugga ásakana um kosningasvik

Demókratar í fulltrúadeild Bandaríkjaþings ætla ekki að leyfa nýkjörnum þingmanni repúblikana frá Norður-Karólínu að taka sæti sitt á meðan rannsókn stendur yfir á meintum kosningasvikum í síðasta mánuði. Sæti hans yrði autt þar til niðurstaða fæst í rannsóknina.

Mark Harris, frambjóðandi Repúblikanaflokksins, hlaut flest atkvæði til embættis fulltrúadeildarþingmanns í 9. kjördæmi Norður-Karólínu í kosningunum sem fóru fram 6. nóvember. Fljótlega komu þó fram upplýsingar sem bentu til þess að brögð hefðu verið í tafli. Um 900 atkvæðum munaði á Harris og demókratanum Dan McCready.

Ásakanir eru uppi um að maður sem Harris réð til starfa fyrir framboðið hafi gengið í hús í ákveðnum sýslum, safnað utankjörfundaratkvæðum og hent þeim. Kjósendur demókrata eru mun líklegri til að greiða atkvæði utan kjörfundar en repúblikanar.

Kjörstjórn Norður-Karólínu hefur fram að þessu neitað að staðfesta úrslit kosninganna á meðan meintu kosningasvikin eru rannsökuð. Repúblikanar í ríkinu leystu kjörstjórnina upp í dag.

Framkvæmdastjóri Repúblikanaflokksins í Norður-Karólínu sakar nefndina um að hafa brugðist skyldum sínum með því að staðfesta ekki kosningaúrslitin og segir mögulegt að flokkurinn leiti til dómstóla, að sögn Washington Post. Demókratar saka repúblikana á móti um að reyna að leggja stein í götu rannsóknarinnar og að „stela“ kosningunum.

Óljóst með framhaldið

Demókratar unnu meirihluta í fulltrúadeildinni í kosningunum í nóvember og nýtt þing kemur saman í byrjun janúar. Steny H. Hoyer, verðandi leiðtogi demókrata í fulltrúadeildinni, segir að þeir ætli að mótmæla því að Harris fái að taka sæti vegna „vel sannaðra kosningasvika“.

„Í þessu tilfelli vega heilindi lýðræðislega fyrirkomulagsins þyngra en áhyggjur af því að sætið verði autt við upphaf nýs þings,“ segir Hoyer í yfirlýsingu.

Ný kjörstjórn á að taka við 11. janúar. Hún gæti ákveðið að staðfesta úrslit kosninganna, krefjast nýrra kosninga eða gripið til annarra ráðstafana. Roy Cooper, ríkisstjóri Norður-Karólínu og demókrati, segist ætla að skipa bráðabirgðakjörstjórn sem starfar þangað til.