Jötunn fordæmir brottrekstur Heiðveigar Maríu

Meðlimir í sjómannafélaginu Jötunn í Vestmannaeyjum fordæma fortakslaust brottrekstur Heiðveigar Maríu Einarsdóttur úr Sjómannafélagi Íslands. Þeir fara fram á að sú ákvörðun verði dregin til baka þegar. Þá hefur verið sett fram sú krafa, af stórum hópi félagsmanna í Sjómannafélags Íslands að haldinn verði félagsfundur vegna grafalvarlegrar stöðu sem upp er komin.

Í tilkynningu sem Jötunn sendi frá sér nú fyrir skömmu og tekur til ályktunar nýafstaðins aðalfundar. Þar eru settar fram alvarlegar athugasemdir við þann gjörning sem Vísir greindi frá og snéri að því að trúnaðarmannaráð SÍ rak Heiðveigu Maríu úr félagi sínu.

Aðför að lýðræðislegri tjáningu

Í yfirlýsingunni segir að það að svipta félagsmann áunnum réttindum af þeirri ástæðu einni að hann gagnrýni stjórnunarhætti yfirstjórnar stéttarfélags síns sé ekki brottrekstrarsök. Þvert á móti beri að fagna áhuga og gagnrýni félagsmanna. Að bregðast á þennan hátt við slíku er „aðför að lýðræðislegri tjáningu alvarlegur misbrestur stéttarfélags sem verður að leiðrétta strax.“

Vegna umræðna um frestun samningaviðræðna sjómannafélaga vill Jötuns koma á framfæri að „ásakanir einar og sér eru ekki nægjanleg ástæða fyrir frestun viðræðna heldur komi fleiri ástæður þar til. Deila innan Sjómannafélags Íslands eru okkur óviðkomandi og er eingöngu milli aðila í Sjómannafélagi Íslands.“

Þetta var samþykkt á aðalfundi í gær.

 

Jónas ætlar ekki að bakka

Ljóst er að mikil ólga er meðal sjómanna. Jónas Garðarsson, formaður SÍ, var í viðtali í hádegisfréttum Bylgjunnar í dag og sagði að það stæði ekki til að bakka með þessa ákvörðun að reka Heiðveigu Maríu úr félaginu.

Þá var fréttastofu að berast tilkynning þar sem þess er óskað að stjórn Sjómannafélags Íslands boði til félagsfundar sem fram fari nú um helgina „í ljósi grafalvarlegrar stöðu félagsins“. Vísað er til undirritunnar yfir hundrað félagsmanna sem fara fram á það.

„Sérstaklega er óskað eftir að Heiðveig María Einarsdóttir verði boðuð á fundinn vegna óljóss lögmætis brottvikningar hennar úr félaginu.“

 

Vísað til réttmætisreglu og laga félagsins

Lagt er til að fenginn verði óháður og vanur fundarstjóri til að stjórna fundinum þar sem búast má við átakamiklum fundi; tillaga er um að Einar Gautur Steingrímsson, lögmaður, verði fenginn í verkið,“ segir í tilkynningunni:

„Okkur, sem setjum nafn okkar á þennan undirskriftarlista, finnst mikilvægt að félagsfundur komi saman í því skyni að félagsmenn geti tekið afstöðu til þess hver séu gildandi lög félagsins og leiðbeint stjórn Sjómannafélags Íslands í því efni áður en lengra er haldið,“ segir jafnframt og er vísað til réttmætisreglunnar  og mikilvægis þess að ekki leiki vafi í gildandi lögum í félaginu.