Tíu sagt upp hjá WOW air

Tíu starfsmönnum flugfélagsins WOW air var sagt upp nú um mánaðamótin. Þetta staðfestir Svanhvít Friðriksdóttir, upplýsingafulltrúi WOW, og segir uppsagnirnar tengjast hagræðingar­aðgerðum félagsins.

WOW tilkynnti í gær um frekari hagræðingaraðgerðir en hætt verður að fljúga tímabundið til Stokkhólms, Edinborgar og San Francisco frá 5. nóvember til byrjun apríl á næsta ári.

„Þessi ákvörðun var tekin með það að leiðarljósi að ná fram aukinni hagræðingu í rekstri félagsins,“ segir í tilkynningu og borið við seinkun á afhendingu á tveimur glænýjum Airbus A330neo-vélum sem áttu að koma nú í nóvember en verða ekki afgreiddar fyrr en í lok febrúar. Því neyðist WOW til að gera breytingar á leiðakerfi félagsins.

Í síðustu viku sagði Icelandair einnig upp á þriðja tug starfsmanna í hinum ýmsu deildum sínum.