Eldur um borð í ferju í Eystrasalti

Uppfært 14:15: Skipafélagið hefur staðfest að allir um borð séu óhultir og að verið sé að draga skipið, Regina Seaways, til hafnar í Klaipeda.



Eldur hefur komið upp í ferju í Eystrasalti með 335 manns um borð. Frá þessu greinir talsmaður litháíska hersins í samtali við Sky News.

Ekki liggja fyrir upplýsingar um umfang eldsins eða um fjölda slasaðra. Eldurinn á að hafa komið upp eftir að sprenging varð í vélarrúmi.

Ferjan ku vera á rússnesku yfirráðasvæði fyrir utan Kaliningrad. Ferjan var á leið frá borginni Kiel í norðurhluta Þýskalands til Klaipėda í Litháen.

Björgunarlið frá Rússlandi og Litháen taka þátt í björgunaraðgerðum.

Misvísandi upplýsingar

Ferjan er í eigu danska skipafélagsins DFDS. Í frétt Sky News er haft eftir talsmanni skipafélagsins að 293 farþegar og 42 áhafnarmeðlimir séu fastir um borð eftir að vélarbilun varð í einu skipi félagsins í Eystrasalti. Talsmaðurinn minntist ekki á að það hafi orðið sprenging. Einungis leggi reyk frá vélinni.

Aftonbladet  hefur eftir rússneskum fjölmiðlum að farþegunum hafi verið komið fyrir á öruggu svæði um borð í ferjunni. Búið sé að slökkva á vélum skipsins sem rekur nú á Eystrasalti.

Ferry carrying 335 people on fire in Baltic Sea https://t.co/Kl5qf92ChQ

— Sky News (@SkyNews) October 2, 2018