Íslandspóstur fær hálfan milljarð í lán frá ríkinu

Ríkissjóður hefur veitt Íslandspósti 500 milljóna króna lán til allt að 12 mánaða til að styrkja lausafjárstöðu félagsins, með fyrirvara um heimild í fjáraukalögum. Frá þessu er greint á vef Stjórnarráðs Íslands.

Í tilkynningunni frá Stjórnarráðinu kemur fram að bréfasendingum hefur farið ört fækkandi um allan heim. Því er haldið fram að auknar tekjur af pakkasendingum, vegna aukins umfangs netverslunar, dugi ekki til að vega upp á móti samdrætti í bréfasendingum. Er þessi þróun sögð hafa neikvæð áhrif á efnahag og lausafjárstöðu félagsins.

Því er haldið fram að þó eiginfjárstaðan sé sterk þá þurfi að styrkja rekstrargrundvöll fyrirtækisins til framtíðar eigi það að geta gegnt hlutverki sínu. Eru nágrannaríki Íslands sögð glíma við sambærilega þróun og nýleg dæmi í Evrópu um að póstfyrirtæki í ríkiseigu hafi fengið hlutafjáraukningu, lánafyrirgreiðslu eða beina rekstrarstyrki til að bregðast við áhrifum þessarar þróunar.

Er Íslandspóstur sagður þurfa á fjármagni að halda þrátt fyrir lántöku undanfarin ár. Leitaði félagið til ríkisins um fyrirgreiðslu og sagði 500 milljónir vanta upp á. Á vef Stjórnarráðs Íslands kemur fram að móta þurfi framtíðarstefnu og áætlun um hvernig haga beri póstþjónustu þannig að hún verði sjálfbær. Samgöngu- og sveitarstjórnarráðuneytið sem ráðuneyti póstmála vinnur að endurskoðun gildandi lagaramma til að tryggja góða póstþjónustu um allt land.

Íslandspóstur er að fullu í eigu ríkisins og hefur félagið rekstrarleyfi frá Póst- og fjarskiptastofnun sem kveður á um að það skuli gegna skyldum ríkisins samkvæmt lögum um póstþjónustu. Í því felst m.a. að félagið fer með einkarétt ríkisins til að sinna póstþjónustu, þ.e. póstsendingar bréfa allt að 50 g., og sinnir alþjónustu fyrir hönd ríkisins til að tryggja öllum landsmönnum aðgang að póstþjónustu með skilgreindum gæðum og á viðráðanlegu verði. Nær alþjónustuskyldan til sendinga allt að 20 kg. Með lánveitingunni tryggir ríkið tímabundið möguleika félagsins til að standa undir þessum skyldum.